Real Madrid boruak a ṭha lo!

Xabi Alonso enkawl Real Madrid chu an boruak a ṭha lo hle niin Spanish media-ten an tarlang a, Vinicius Jr, Federico Valverde, Rodrygo, Brahim Díaz, Endrick leh Ferland Mendy te chu Alonso laka lungawi lo langsar zual niin an sawi.

Media ṭhenkhat chuan English mdifielder Jude Bellingham pawh Alonso hnuaiah a hlim lo niin an sawi a, hei hi thu puar pawleng mai a nih loh chuan Real tan a pawi thui thei ang.

Alonso-a'n Kylian Mbappe chu 'a changtupa' dinhmun a chelhtir tak avangin Vini lungawi lo hi chu thil chiang sa a ni a, Brazilian forward hian June 2027 thleng bak Real-ah contract a nei tawh lo.

January aṭang tawh khan Real hian contract thar an zawrh a, mahse, a ziak duh lo. Tun hnaiah Vinicius Jr hian Madrid president Florentino Perez hnenah Alonso nena an inkar ṭha lo avangin, a tan contract thar ziah ngaihna a awm loh thu a hrilh niin an sawi.

Hmanni lawka Ballon d'Or meuh dawn beisei hman Vini hian tun season-a match 17 an khelh tawhah vawi nga chiah minute 90 khelh tluan a nei a, vawi li chu bench lamah a awm.

Alonso-a ruahmannaah a pawimawh tawk lo niah Vini a inngai a, media ṭhenkhat tarlan anga lungawi lo zinga Bellingham a tel tak tak bawk a nih chuan Alonso zawk hian chhuahna kawngkhar lam a pan vat lo ang tih a sawi theih lo.

Real hian Spanish manager ho hian season bul ṭan ṭha viau mah se, tun hnaiah beisei ang result an nei lo a, an match hnuhnung pathumah an chak lo - Liverpool (1-0) lakah an tlawm a, league lamah Rayo Vallecano (0-0) leh Elche (2-2) an draw leh bawk.

Madrid khaw club hian zanin dar 1:30-ah Champions League match khel turin Olympiakos an lenchilh zui dawn a, Alonso-a'n team boruak ṭha lo chingfel turin hnehna chan a mamawh.