Ward XVII leh Ward IV ten final an lut

G90's buatsaih 4th GIG Motors Veteran Football Tournament 2025 semifinal chu nimin khan 1st BN MAP Ground, Armed Vengah khelh a ni a, Ward XVII leh Ward IV ten an khingpui ve ve hnehin final an lut. Nomawi inchuhna hi November ni 28, Zirtawpni chawhnu dar 1:00-ah khelh a ni ang.

Ward inṭhenawm ve ve semifinal-ah an inhmachhawn a, inkhel hmasa zawkah Joseph Lalrinmawia a langsar. Republic Vengthlang forward Joseph hian Ward XVII tan hattrick a siam a, ani hi Lammuala National U16-a Mizoram champion puitu zinga mi a nih bakah Republic Veng double champion (Inter Village leh CYMA Football) ṭuma player pawimawh a ni bawk.

Ward XVII-ah Venghlui, Republic Veng, Republic Vengthlang leh Upper Republic te an awm a, an khingpui Ward XVIII-ah Mission Veng, Thakthing, Venghnuai, Salem Veng, ITI Veng, Damveng, Tuikhuahtlang leh Model Veng te an awm. Ward XVIII hian basketball lama hming chher Moses Zoremmawia leh Mizo striker ṭha ber zinga mi Ari Benjamin LR Hmar hmangin si phurh sut ve ve mah se Joseph-a an dang zo lo.

Semfinal hnuhnung zawkah Ward III leh Ward IV te an inkhel a, Ward III-a veng awmte hi Ramhlun North, Ramhlun Venglai, Ramhlun Vengthar, Ramhlun Sports Complex leh Laipuitlang te niin, Ward IV lamah Ramhlun South, Ramthar Veng, Ramthar North leh Aizawl Venglai te an awm. Ward IV lam hi inkhelh thiam veng awm tamna a ni a, Lalthlamuana Ralte leh Samuel Lalhruaitluanga te goa hmangin hnehna an chang.