Maignan-a'n Milan chhuahsan hnai

AC Milan goalkeeper Mike Maignan chu Italian club-ah hian a cham chhunzawm zel dawn lo niin a lang a, season tawp ruala contract hmang zo tawh tur keeper hi Milan nen hian contract thar chungchangah an indawr tawh rih lo niin an sawi.

Milan hian an keeper hi chelh tum lo an ni lo. French keeper hi an hnena kum hnih dang cham turin contract an zawrh a, kum khata euro maktaduai 2.8 a hlawh chu €5.5mtd-a tihsan an inhuam bawk.

Mahse, Milan contract zawrh hian Maignan a hmin zo lo a, Italian club pawh hian na takin an dawr zui lem lo. Kum 2021-a Lille aṭanga Milan pantu hi Chelsea leh Juventus chuan an thlithlai mek nia sawi a ni a, club khelhna a haihchham dawn lo.

Kum 30 mi Maignan hi Chelsea chuan Robert Sanchez thlak turin an duh niin an sawi a, nipui lai khan dawr tawh mah se an inla lut thei lo. Tunah a thlawna lakluh theihna chance a awm a, Blues hian chan ngei an tum dawn.

France tana vawi 37 inlan thei keeper hian Milan tan inelna hrang hrangah match 176 khel tawhin, Serie A leh Supercoppa Italiana-ah vawi khat ve ve nomawi a chawipui a, Serie A Team of the Year-ah vawi hnih a lang tawh bawk.

Kum 2021 khan Lille chu Ligue 1-ah a lo champion pui tawh bawk a, Juve-in duh ve tho mah se, London lama puanthuah tel a, chona thar hmachhawn a châk zawkin a rinawm.