Davis Cup-ah Italy an champion

Italy-in lungthu kim nan Davis Cup nomawi an chawi a, November 24, Thawhṭanni zana final khelhah Spain 2-0 in an hneh. A zawna vawi thum nana Davis Cup champion ṭumah hian Italy tan Jannik Sinner a la tel lo zawk.

Italy hian Davis Cup nomawi hi vawi li an chawina a ni a, anmahni bakah United States chiah kum zawnin vawi thum emaw a aia tam champion thei an awm. US hi 1968-72 chhung khan a zawnin vawi nga an champion.

An champion hnuhnung pahnihah Italy tan world no.2 Sinner a pawimawh a, tun ṭumah erawh season thar atana inpuahchah a duh avangin an thiampuipa hi a tel lo.

Final-ah Matteo Berrettini chuan Pablo Carreño Busta chu 6-1, 6-2 in an hneh a, Flavio Cobolli pawhin Jaume Munar lakah set hmasa ber hloh mah se 1-6, 7-6 (7-5), 7-5 in hnehna a chang ta tho. Hei vang hian doubles match khelh a ngai ta lo.

Tun ṭuma Italy squad hi Flavio Cobolli, Lorenzo Sonego, Matteo Berrettini, Andrea Vavassori leh Simone Bolelli te an ni a, captain chu Filippo Volandri a ni. Champion tur hian Italy-in Austria (quarterfinal), Belgium (semifinal) leh Spain (final) te an hneh.