Mourinho 'Spurs'-in Solskjaer 'United tluk lo

Jose Mourinho chuan Nilaini zan khan Tottenham Hotspur manager nichungin Old Trafford a lenglut a, Ole Gunnar Solskjaer kaihhruai Manchester United lakah 2-1 in an tlawm.

United hian an elpui Spurs an hneh avangin point 21 hmuin paruknaah an awm. Mourinho erawh boruak lian tak nen a club hlui tlawh mah se Solskjaer-a hoten chak an phu avangin inkhelh zawhah hawi sang thei a ni lo.

Manchester United-in bul an ṭan ṭha a, minute rukna lekah Marcus Rashford-a ball pet chu Hugo Lloris inhliam vanga lut Paulo Gazzaniga-a'n a dang lo. Spurs second keeper hi goal luh chhanah dem theih mah se goal dang luh belh tur a dan hnem avangin dem zui aiin fak a phu zawk.

Rashford bakah Anthony Martial inhliam vanga lut Mason Greenwood pawhin Tottenham Hotspur tan harsatna a siam bawk. United-in goal an khung nual dawn emaw tih hnuah Spurs an rawn lang nawlh a, Mourinho hnuaia harhtharhna chang Dele Alli-a'n Ashley Young leh Fred te pet khumin minute 39-naah goal mawi bik a khung.

Inhnehtawk chunga dressing room an luh avangin Jose Mourinho hote second half-ah an rawn thawhchhuah beisei a ni a, amaherawhchu Moussa Sissoko-a'n ṭul lo taka Rashford a tihtluk avangin penalty a chawi. English striker Rashford hian 'cool' takin minute 49-naah a khung a, goal dang a luh belh lo.

United ṭantuten Jose Mourinho chu rinlawk ang ngeiin ṭha takin an dawng sawng a, amaherawhchu goal pawimawh khungsak tawhtu leh an manager ni lai Solskjaer chunga thawm an neih dan erawh a pha lo.

Tottenham Hotspur manager Mourinho chuan, "Ṭan phatah keini aiin an nawr na ngam a, second half-ah goal theih tawh lohna tura penalty kan chawi kha a pawi ta ber chu a ni. Hma an hruai leh tak avang khan an duh angin an khel thei a ni," tiin a club hluite an khelh ṭhat thu a zep lo a, goal khungtu Dele Alli leh Rashford te a fak ve ve bawk.

Manchester United manager Ole Gunnar Solskjaer chuan, "Hnehna chan hrim hrim chu a lawmawm a, ka naute pawh an inzir zel. Zanin bik erawh an khel ṭha lehzual a, tun hnaiah draw kan ngah avangin point thum hi a hlu hle. Match thum li vel kan chak zawn thei a nih chuan Man United boruak a awm chho leh thei ang," tiin an khelh danah a lungawi thu a sawi.

United hian Inrinni zanah Manchester City hmachhawn turin Etihad Stadium an lenglut dawn a, Tottenham erawhin an mualah Burnley an hmachhawn thung ang.