MBA-in champion-te lawmpui

Mizoram Badminton Association chuan, Yonex-Sunrise 48th Inter State - Inter Zonal & National Junior Badminton Championship 2025-a champion, Mizoram team-te champion lawmpuina chu November 25, Zirtawpni khan a buatsaih a, ruai nen ropui taka lawm a ni.

MBA-te hian Lengpui Airport-ah Mizoram team-te hi lo hmuakin, pangpar leh diar hlan an ni a, champion lawmna pui ber chu Mizoram Badminton Centre, Zuangtuiah neih chhunzawm nghal a ni.

MBA secretary general Dr K. Vanlaldinpuia chuan inkhawm hi kaihruaiin, MBA president Dr. Lallianzuala Hnamtein lawmna thu a sawi bawk.

He hunah hian Jeje Lalpekhlua, MLA chu khuallian niin, India international striker hlui Jeje chuan, "Infiamnaa hlawhtling tak tak tur chuan training ṭhat piahlamah, hunawl hman ṭhat leh hman dan thiam a ṭul," a ti a, champion lawmpuina atan Rs. 50,000 a thawh nghal bawk a ni.

John Lalpeka, CEO, GIG Motors chu khualzahawm atan hman a ni a, ani hian national championship khelh tur la awm atana Mizoram team jersey a tlangzarh nghal. Mizoram badminton hmasawnna tura MBA-in kum 2018 aṭanga a thawhpui tawh NEIDA aiawhin grand manager Jacob Lalṭhazuala'n thusawina hun a nei bawk.

Mizoram aiawha India ram champion ni thei, Mizoram Junior Boy's team leh official-te hi lawmpuina pawisa fai hlan an ni a. Lalrindika Raltein Mizoram team member zawng zawngte thilpek a pe bawk.

November 18 - 24 chhunga neih zawh tak, National Junior Badminton Championship-ah hian Mizoram boy's team-ten gold an lak bakah, Durtlang rawlthar C. Lalramsanga chuan boy's doubles-ah gold hlawh chhuakin, mixed doubles-ah bronze medal a la bawk a ni.