Leverkusen hmaah Machester City an tlawm!

Manchester City-in an league match hnuhnung berah 2-1 in Newcastle United an ngam lo a, coach Pep Guardiola-a'n St James' Park-a inlan player aṭangin player 10 ngawt Bayer Leverkusen lakah a siksawi a, a tifuh lo.

Champions League-a City a kaihhruai vawi 100-naah German club hi 2-0 in an ngam lo a, Alejandro Grimaldo leh Patrik Schick ten goal khat ve ve an khung - City-in a chhanletna tur an neih loh avangin an tlawm.

Etihad Stadium-ah City-in inkhel bul ṭan ṭha viau mah se, Nathan Ake-a hun neih duhawm chu Leverkusen keeper Mark Flekken chuan ṭha zetin a dansak a, hemi hnu hi chuan City an zuai tial tial em ni chu aw, tih mai tur a ni.

Minute 23-naah Grimaldo chuan hmahruaina goal a khung a, second half-ah Czech striker Patrik Schick chuan Ibrahim Maza cross chu goal-ah a chantir bawk - goal an chhuah ve bawk si lo a, Leverkusen an chak ta daih.

Pep-a'n tlarhmaah Omar Marmoush, Oscar Bobb leh Savinho te inkhel bul a ṭantir a, mahse, German club hmaah an chance neih an chhawr thei lo - Haaland, Phil Foden leh Rayan Cherki te second half-ah luhtir an ni a, mahse, goal an khung thei bik chuang lo.

City tan Champions League match nga an khelha vawi khat an tlawmna a ni a, Leverkusen tan vawi hnih an chakna chiah a ni thung - playoff khelh beiseina a nung thar ve leh ang.

Pep Guardiola chuan inkhelh zawhah, "Hnehna chang ila chuan khati taka player siksawi kha buaina a ni lo ang. Tunah erawh kan tlawm a, ka thiam loh a ni tih ka pawm a ngai.

"Season rei tak a nih avangin player siksawi a, kan player a tam thei ang ber chhawr hi ka tum dan sa chu a ni a, mahse, tun ṭum erawh ka thlak nasa hret a ni ang - hnathawh tum loin, tihsual loh tumin an khel a ni ber!

"Kan beisei angin kan khel lo a, mawhphurtu ka ni. Chakna chance kan neih ṭhat kan bawhpelh a, kan match khelh leh turah theihtawp chhuah a ngai dawn a ni," a ti a, an chak loh chu a mawhphurhna a nih thu a sawi.