Aston Villa mualah Young Boys

Tun laia khel ṭha tluang tak Aston Villa chuan zanin dar 11:15 hian Europa League an khel dawn, an khelmual hman thiam Villa Park-ah Young Boys an lo mikhual dawn lo a ni.

Team pahnihte hi season hmasa Champions League-ah khan an lo intawng tawh, coach ṭha Unai Emery nauten khualmualah 3-0 in hnehna an chang, tun hnaia an khelh dan chhut chuan tun ṭumah pawh hi chak tura rinkai zawk an ni ang.

Premier League club Villa hian Europa League match an khelh hnuhnung pali zinga pathumah hnehna an chang thei a, inrintawkna an nei sang hle ang tih a chiang. Liverpool an hneh loh hnuah Bournemouth leh Leeds United te an hneh leh tawh bawk avangin an boruak a fuh hle.

Villa hian hliam vangin Tyrone Mings leh Andres Garcia te an chhawr thei dawn lo, damkawr Amadou Onana chu a dinhmun ngaihchan a la ngai bawk. Mings bik hi a chawlh rei dawn avangin a aiah Ross Barkley ziahluh a ni a, English midfielder hi chhawr thei a ni dawn.

Maccabi Tel-Aviv an hneh ṭuma khel ṭha tak Donyell Malen hmel kan hmuh leh a rinawm a, tlarhma lamah Ollie Watkins nen an inkawp thei ang - Jadon Sancho, Evann Guessand leh Victor Lindelof te an awm bawk avangin Emery-a'n duhthlan tur a nei ṭha tawk.

Mipui hmuh chak zinga mi chu Morgan Rogers a ni dawn - Rogers hian Leeds United lakah goal hnih a khung a, mikhual Young Boys tana ven uluk ngai bik tur a ni ang a, an veng thei ang em tih chu kan hre thuai dawn a ni.

Young Boys pawh hi an match hnuhnung pahniha chak thei an ni a, tun season Europa League goal hnih khung tawhtu Joel Monteiro an nei a, ani hu muak sir vei lama hnawksak ṭhin tak niin a tlan chakna leh ball thiamna chu Villa defender te lu tihai thei tura ngaih a ni.