Point hmu ve lo Ajax!

Tun season Champions League match nga an khelh tawh chinah Ajax an la tlawm fai vek! European football inelna sang berah hian team 36 an inlan, an zingah Ajax chauh hi point la hmu ve lo an ni hial.

Thawhlehni zan khan Ajax hian Benfica an mikhual a, Portuguese club lakah hian 2-0 in an tlawm. Johan Cruyff ArenA-a inkhelah, mikhual tan Samuel Dahl leh Leandro Barreiro ten goal khat ve ve an khung a ni.

Ajax hian point an la hmuh ve loh avangin playoff pawh an khel phak dawn lo tih a chiang der tawh, match nga an khelh chinah goal khat chiah an khung avangin tun season UCL chu Dutch club tan mangchhia a ni a, theihnghilh daih an duhin a rinawm.

José Mourinho enkawl Benfica erawhin point thum hmuin 29-naah an awm a, playoff khel turin beisei an la nei. Mourinho chuan, "Ṭha taka bul ṭan a, goal khung hma bawk chuang kawng a awlsam phah ṭhin, tun ṭumah pawh kha chutiang chiah chuan kan ti.

"Champions League a nih tawh hi chuan a boruak a danglam a, an khingpui khan second half-ah phei chuan inkhel an thunun zawk. Mahse, ka naute kha an zam phah lo, mahni goal khung venhim theih hi a pawimawh lai chu a ni," a ti.

Ajax captain Davy Klaassen chuan, "Hma kan sawn, kan match hnuhnung zawk ai kha chuan nasa takin hma kan sawn tih pawh ka hmu, mahse a tir lam minute 20 chhung vel kan khelh ṭhat loh avangin a vanduai zawkah kan ṭang.

"Kan tan chuan hun harsa leh khirhkhan a ni a, he hun aṭang hian kan la tho chhuak leh ngei ang tih ka ring. Ajax kan ni a, tlu hlen tur kan ni lo, kan chak lohna leh ṭhat tawk lohna lai kan siamrem thuai ang," a ti.

Dutch League lamah pawh Ajax hi parukna an ni mek a, season an hman ṭhat lohna aṭanga tal chhuah an tum mek a ni.