Napoli chakna McTominay

Scott McTominay lansarh zanah Napoli chuan an mikhual Qarabag chu 2-0 in an hneh - Italian club tan hian McTominay chuan goal a khung bakah Marko Jankovic-a'n anmahni lamah a ti lut bawk.

Diego Maradona thih aṭanga kum ngana a ni a, an player ropui fam ta Maradona hriatreng tana an stadium buatsaih Diego Maradona Stadium-ah Naples mipui an pungkhawm a, an duh leh beisei ang result an hmu bawk a ni.

Antonio Conte naute hian inkhel thunun mah se goal an khung mai lo, minute 65-naah McTominay chuan Qarabag goalkeeper Mateusz Kochalski dan theih lohin a tauhlut a, inkhel boruak a danglam zui ta a ni.

Manchester United aṭanga loan hmanga an hawh Rasmus Hojlund chuan goal khung theihna remchang ṭha bik a nei, mahse a penalty pet chu keeper Kochalski chuan a lo dansak - Hojlund vanneih zan a ni lo.

Napoli coach Conte chuan, "Naples khawpui leh mipui tan chuan zan danglam tak a ni. He khawpui tana Maradona hlutna hi sawifiah thiam chi a ni lo a, tun ṭumah pawh khan kan rilru a luah hneh hle.

"Hliam leh harsatna dang avanga inkhel thei lo kan ngah hle, chutiang karah pawh chuan khelmuala lut thei chin ten ṭha takin an khel a, kan phu ang ngeiin hnehna kan chang," a ti.

Napoli hian bench-ah player pasarih chauh an nei, an zinga pahnih chu goalkeeper an ni. Khel thei lo zingah - Andre Frank Zambo Anguissa, Billy Gilmour, Kevin De Bruyne, Leonardo Spinazzola leh Romelu Lukaku te chu a langsar an ni.