A season hman danah Alcaraz a lungawi

Mipa tennis world number 1 Carlos Alcaraz chuan kum 2025 season a hman dan a thlir kir a, duhthusam ang vek ni lem lo mah se a kum hman danah a lungawi thawkhat hle tih a sawi chhuak.

Spanish star hian kuminah match 71 laiah hnehna a chang a, nomawi pariat a lak zinga pahnih chu Grand Slam a ni - inelna lian bik majr title a lak belhkhawm chu paruk a tling ta bawk a ni.

Kum 22 mi Alcaraz hian an ram Spain tan Davis Cup pawh khelh a tum a, mahse a malpui vei lam hliam vangin a inkhel thei ta lo. Kuminah exhibition match khelh tur chu la nei mah se, inelna pangngai a hmachhawn dawn tawh lo.

Grand Slam vawi ruk champion tawh Alcaraz chuan, "Player tin hi chuan sawisel leh ngainat loh zawng kan nei vek, tennis calendar kan hman lai a hautak tia sawi an tam, kei pawhin hautak ka ti hle. Theih ni se la chuan tih danglam theih pawh ka chak.

"Mahse, ngun taka ngaihtuah chungin tournament khelh tur bik kan thlan thiam a pawimawh a, hliam nei lo tura inenkawl uluk bakah fimkhur a ngai, rilru leh takasa a inpeih reng a ngai tihna a ni.

"Ram leh khawpui inkar hlat tak takah kan inkhelh a ngaih chang a awm a, mi ṭhenkhat tak chuan zin kual ringawt pawh hi buaina tham a tling tih ka hria, hetiang boruak karah hian hlawhtling tur chuan chhel taka awm a ngai ve bawk.

"Season ka hman dan la chhut kir a, tih fuh loh leh siamṭhat ngai lai chu ka nei nual mai. Chutihrualin, ka tan chuan kum ṭha leh hlu tak a ni a, ka hriatreng tawh tur thil tam tak a thleng, ka chet fuh tawk lohna laiah pawh hlawkna tam tak ka chhar," a ti.

Alcaraz hian ATP Finals-ah pawh khan final a lut a, mahse nomawi inchuhna inkhelah hian Jannik Sinner lakah a vanduai zawkah a ṭang. January aṭangin season thar an ṭan dawn, inelna lian hmasa ber atan Australian Open an khel leh ang.