McLaren an la champion fel bik lo

Formual 1 season tawp lam inum boruak a sang a, dinhmun ṭha taka ding tawh McLaren driver Lando Norris leh Oscar Piastri ten intlansiak hhnuhnung berah point an hmuh belh loh avangin an la champion chiang bik lo.

Las Vegas Grand Prix-ah khan McLaren team hian an car hman chungchangah dan an bawhchhia a, hei vang hian an diver pahnih Norris leh Piastri te chu intlansiak lo ang an ni, point an hmu ve lo.

Norris leh Piastri ten point an hmuh loh lai hian Max Verstappen erawh a chak ber - Red Bull driver hian hmahruaitu Norris an phak lohna chu point 42 a la ni a, an inkar a la zau angreng hle.

Amaherawhchu, car intlansiakna sang ber hi season tawp hmain vawi hnih an la tlan dawn. Qatar Grand Prix leh Abu Dhabi Grand Prix te tlan hmabak an la nei, heng intlansiak pahnih aṭanga point hmuh theih tam ber chu 58 lai a la ni.

Champion lai Verstappen tan beisei a la bo lo, chutihrualin amah a chet ṭhat bakah midang an chetsual tel a ngai tawh dawn. McLaren driver pahnih inthlauhna pawh point 30 a la nih avangin champion tur zawk a chiang thei lo, inelna a la hmuhnawm chhunzawm dawn.

British tlangval Norris chuan, "Thil thleng tawh chinah khan engmah tih danglam theih kan nei lo a, thlak danglam tum pawh ni ila awmzia a nei phak tawh lo. Hma hun kan ngaihtuah a ngai tawh zawk, tunah chuan Qatar atan rilru zawng zawng kan sen a ngai tawh zawk a ni," a ti.

November 30, Pathianni zan dar 9:30 hian Losail Circuit-ah Qatar Grand Prix an tlan leh ang.