MIZBA Mega Boxing: Amateur boxing-ah hmasawnna hmuh tur a awm

Mizoram chhung boxing inelnaa thuneitu sang ber MIZBA buatsaih Sailo Agencies-MIZBA Mega Boxing 2025 chu R. Dengṭhuama Indoor Stadium, Mualpuiah khelh chhunzawm zel a ni a, amateur boxer-ten hma an sawn tih a hmuh theih.

November 25, Thawhlehni zan aṭangin tawnhriat nei boxer an inlan ṭan a, inelna pawhin a hmuhnawm sawt. Chutihrualin hmuhnawm tak tak tur chuan la inthlit fim leh hret a ṭul. Vawi khat inelna boxer-ten hma an sawn a, officiating-ah hmasawnna tur a awm.

Inelna hi amateur boxing a ni a, referee-ten professional ang maiin an count har a, hei hian national level-ah nghawng a nei dawn. National level chinah chuan referee-ten an count hma a, tun ṭum inelna hi National Boxing Championships-a Mizoram aiawh tur zawnna a nih avangin inelna kalhmang pawh National Boxing C'ship-a an kalpui ṭhin dan anga kalpui a pawimawh hle.