Sawi hlawh Madueke

Nipui bazar lai khan Arsenal chuan Chelsea aṭangin Noni Madueke an la lut a, tun hma lamin North London club hian Blues aṭangin player an lei fo tawh, a fuh loh ṭhin avangin Madueke pawh hian lawm lotu a ngah hle.

Mahse, English winger hi khelmual chhungah a hmunnawm ṭhin a, hun rei lote chhungin Gunners ṭantute pawhin an pawm thei niin a lang. #NoToMadueke tia an sawi hial kha ni mah se, tunah chuan au eltu a nei ta meuh lo.

Khup hliam vanga a chawlh reng hnuin Tottenham Hotspur lakah a lo kir a, an match hnuhnung bera Bayern Munich an hneh ṭum pawhin goal a khung - Pathianni zana a club hlui a hmachhawn tur hian sawi zui pawh a hlawh.

Kum 23 mi Madueke chuan, "Mite hriat kan hlawh ve a nih chuan, kawng hrang hranga kan chanchin kan sawi dan tur kha chu kan hrethiam ve tur a ni, tun hma pawhin sawiselna leh fakna hi chu tam tak ka lo dawng ve tawh a, ka hrethiam hle.

"Stamford Bridge-ah pawh hian ṭha takin min lo dawngsawng ang tih ka beisei lem lo, min lo auel a nih pawhin mak ka ti lo ang. Professional footballer ka ni a, khelmual pawn lam boruak chuan ka inkhelh dan a tidanglam lo ang," a ti.

Noni Madueke hian a club hlui a hmachhawn dawn a, amah duh loa chhuahtir tute lakah goal khung a châk hlein a rinawm - Bukayo Saka a awm avangin bul a ṭan lo mai thei, khelmualah erawh a luh ngei a rinawm.