MIZBA Mega Boxing: Zorammuana hun a thleng ta

Mizoram Boxing Association (MIZBA) buatsaih Sailo Agencies-MIZBA Mega Boxing 2025 chu R. Dengṭhuama Indoor Stadium, Mualpuiah chhunzawm a ni dawn a, zanin hian boxer en châkawm ber zinga mi Zorammuana (Valtea) a inlan dawn.

Tuipui tlangval Valtea hi 47-50 kg category-ah a tel dawn a, zanin bout hmasa berah Niawhtlang tlangval Lalchhuanpuia a hmachhawn ang. Valtea hian Mizoram chhung inelnaah record a nei ṭha a, a tel tawhnaah gold medal a la vek.

Kum 2023 khan Elite Men's National Boxing Championship-ah silver medal a la a, best challenger boxer-ah an thlang. Hemi kum vek hian Goa National Games-ah silver medal a la.

Kum 2024-ah pawh National Boxing C'ship-ah medal a la leh a, bronze a la tawh thung. India aiawh pawhin nikum khan Kazakhstan-ah Elodra Cup a hmachhawn a, medal a la lo thung. Valtea hian boxing thiam vangin Indian navy petty officer hna a chelh a, Mumbai-ah boxing khelin a awm mek.

Valtea bakah Mizo boxer ṭhate chevel hi Zonet Rihnim, Empai leh YouTube hmangin a en theih. A hmuna inhnek en man mi pakhat tan Rs 50 chauh a ni.