Veteran football-ah Ward IV an champion

G90's buatsaih 4th GIG Motors Veteran Football Tournament 2025 final-ah Ward IV chuan nimin khan Ward XVII 5-2 a hnehin an champion. Final-a goal hmahruai khungtu Zohmingliana Ralte chu best player-a thlan a ni.

1st BN MAP Ground, Armed Venga inkhelah Ward XVII-in bul an ṭan ṭha zawk a, Rorelliana hmangin minute 21-naah goal an khung. Ward IV-in I League-a Aizawl FC champion puitu Zotea hmangin minute riat hnuah an sut a, first half-ah 1-1 a ni.

Second half-ah pawh Ward XVII-in Rorelliana hmangin hma an hruai nawn a, mahse Ward IV-in Lalthlamuana Ralte hmanga siphurh an sut nghal. Hun tawp hma hretin Samuel Lalhruaitluanga'n Ward IV tan goal pawimawh bik a khung a, XVII-in siphurh sut an tum luatah F Lalrinnunga leh John Lalnuntluanga ten injury time-ah an khung belh.

Ward IV hi 5-2 ngawtin chak mah se insawp erawh a ni lo a, hun tawp thlengin inkhel a ṭang. Ward IV-ah hian Ramhlun South, Ramthar Veng, Ramthar North leh Aizawl Venglai te an awm a ni.