Mizo weightlifter an che ṭha

Asmita Khelo India Women Youth, Junior leh Senior Weightlifting Championships East zone neih mekah Mizoram weightlifter Annie Lalruatfeli Colney chuan gold medal a chawi chhuak.

Kolkata,West Bengal-a inelna neih laiah hian Annie Lalruatfeli Colney hi Youth 53kg huangah inlanin, snatch 55kg, clean & jerk 75kg, total-ah 130kg a chawi a, Bethlehem Veng tleirawl hi a elpui zingah a chungnung ber a ni.

Youth-ah T. Lalhmangaihtluangi a inlan a, Champhai Ruantlang tleirawl hian 48kg huangah silver medal a la thung. Ani hian snatch 46kg, clean & jerk 60kg, total-ah 106 kg a chawi thung.

Pricilla Biakremmawii pawhin bronze medal a hlawh chhuak. Medal la turin Khawzawl Lungvar tleirawl hian snatch 67kg, clean & jerk 88kg, total 155kg a chawi thung a ni.

Asmita Khelo India Women League Weightlifting Championships East Zone-ah hian, Mizoram aṭangin player panga leh official pahnih - Zohmangaiha, MSSC coach leh Lalremruata (manager), Dawrpui Vengthar te an feh chhuak a ni.