Chak loh nei loin Mizoram an tla

Dr. Talimeren Ao Junior Girls’ National Football Championship 2025-26-ah Mizoramin match hnuhnung berah Madhya Pradesh 4-2 in an hneh a, ṭum inelnaah chak loh nei lo mah se group stage an paltlang lo. Mizoram leh Maharashtra ten point sarih ve ve an hmu a, goal difference-ah Maharashtra dinhmun a ṭha zawk.

Chumoukedima, Dimapur, Nagaland-a inelna neihah group match hnuhnung ber khelh hmaa hmahruaitu chu Mizoram an ni. Ningani tlai khan Maharashtra-in Himachal Pradesh 14-0 in an hneh a, goal difference pawh 2 aṭangin 16-ah a sang dawrh.

Zan lamah Mizoramin Madhya Pradesh an hmachhawn a, group stage paltlang turin goal riat tala chak a ngai. Head coach R. Lalhminghlua hoten Madhya Pradesh lakah hnehna an chang a, mahse an chakna zat erawh 4-2 chauh a ni. Mizoramin an mamawh zat an khung phak loh avangin group stage an paltlang zo lo.

Mizoram coach Peter Lalawmpuia chuan, "Mut a la tui thei lo, kan duh aiin Himachal Pradesh lakah kan khung tlem hret," tiin group match hnuhnung ber khelh hmain Vanglaini a hrilh a, a thlirlawk dik. Mizoramin group stage an paltlang loh chhan hi Madhya Pradesh an sawp loh vang ai mahin Himachal Pradesh an sawp tawk loh vang a tih theih a, Maharashtra laka hnehna an chan zawh loh vang a ni thei bawk.