Man United buaina belhchhah theitu Palace

Manchester United-in November 30, Pathianni zan dar 5:30 hian Crystal Palace hmachhawn turin Selhurst Park an tlawh dawn a, inkhel result hian Ruben Amorim-a hote hmalam hun tur a hril ang. United hian match thum chhung chak hmel hmu tawh lo mah se an chak a nih chuan season thara Champions League khelh beiseina a sang thei dawn.

Eagles hian kar laihawlah Strasbourg chu Europa Conference League-ah 2-1 in hneh lo mah se Oliver Glasner hoten Arsenal lakah player pawimawh Eberechi Eze an chan chungin season an hmang ṭha. Palace hi Premier League-ah panganaah an awm mek a, point 20 an hmu tawh.

Glasner hote hian season bul ṭan nan Community Shield-ah Liverpool an hneh a, Premier League-ah pawh Reds an hneh nawn. Chutihrualin tun hnaia Reds khelh dan thlir chuan champion lai laka chak hi intihtheihna chi a ni tawh lo thung.

Eagles hian United lakah record an nei ṭha a, league match hnuhnung pangaah vawi thum an chak a, an inhmachhawn hnuhnung paliah goal an chhuah lo. Selhurst Park-ah hian Man United-in July 2020 hnuah chak hmel an hmu tawh lo.

Man United hi table-ah 10-naah awm daih mah se point 18 hmuin Palace an phak lohna hi point hnih chauh an ni a, hnehna an chang a nih chuan Eagles chungah an awm thei dawn. Team pahnih hian tlarhnungah player pathum ve ve a hmang a, an formation an hman a inang thuak avangin Oliver Glasner leh Ruben Amorim te tan inkhel pawimawh a ni.

Amorim-a hote hi hliam vangin an buai mek a, khup hliam vangin Benjamin Sesko a khel thei dawn lo. Harry Maguire leh Matheus Cunha te dinhmun a chiang lo a, Palace erawhin captain Marc Guehi an chhawr thei dawn. Everton laka chak lo Man United hi chak lo zawn thei dinhmunah an ding.