Champion thei dinhmuna ding Norris a chiai lo

Pathianni zan dar 9:30 hian Formula 1 Qatar Grand Prix an tlan leh dawn, driver championship hmahruaitu Lando Norris chu a vawi khat nana champion mai thei dinhmunah a ding a, dinhmun ṭha taka ding tawh mah se pawn lam boruakin a ti buai lem lo.

McLaren driver Norris hian a teammate Oscar Piastri leh Red Bull car khalhtu Max Verstappen te aiin point 24-in hma a hruai fal mek, champion tur chuan amah hnaihtu pahnih te aia point hniha a hmuh tam a tawk.

Qatar GP bakah hian tun season chhungin intlansiak pakhat bak a awm dawn tawh lo, tun kar tawpah hian champion a chian ngei a rinawm. Chutihrualin, chetsual chuan point khat lek pawh hmuh belh loh theih a ni tho.

British tlangval Norris chuan, "Point 35 laia hnufual zawk ka nih lai leh, point 24 laia hma hruai faltu ka nih lai pawh hian ka rilru a danglam chuang lem lo a, engthawl leh nuamti takin inelna hi ka hmachhawn mai ṭhin zawk a ni," a ti.

Las Vegas Grand Prix an tlan ṭum pawh khan McLaren driver pahnih hian point an hmu miah lo, champion lai Verstappen-a'n tha a la thlah duh si loh avangin Losail Circuit-a intlansiak tur hian ngaihven a hlawh lehzual dawn a ni.

Tun hnai season li chhung chu Red Bull leh Verstappten ten Formula 1 inelna an thunun viau a, kuminah erawh thil a danglam ta. Red Bull-in hmasawn an mamawh a, driver ṭha Max-a pawhin season tharah chuan thapui a thawh a ngai tawh dawn tih a chiang.