LBS Suzuki MiMSA Racing hun a thleng dawn ta!

Mizoram Motorsports Association (MiMSA) chuan LBS Suzuki thawhpuiin, tualchhunga championship an neih tawha ropui ber ni thei turin inbuatsaihna an kalpui mek, December 3-6 chhungin Tuirial Airfield-ah ennawm leh hun hlimawm tak nen 2025 season an khar dawn.

Mizoram State Sports Council kum 50 tlin lawmna a ni nghal dawn bawk a; two-wheeler chi hrang hrang kawng ngila intlansiak (drag race) leh tlankawnga intlansiak (circuit race) bakah kawng chhiaa intlansiak (motocross) a awm dawn a, kawng ngila car intlansiak a awm tel bawk ang.

Championship sponsor LBS Suzuki hnen aṭanga lirthei leitute tan tlankawnga Suzuki One Make Race (250cc stock class) a awm ang a, Suzuki V-Strom (250cc) bik tan kawng chhiaa intlansiak bakah Suzuki scooter neitute inelna bik siamsak an tum bawk.

A duh apiang tan man chawi loin a hmunah en theih a ni dawn a, MiMSA hruaitute chuan championship an buatsaih vawi 32-na tur a ni a, ṭum dang aia ropui leh hmuhnawm a ni dawn tih sawiin, en manhla tak a nih dawn avangin a hmuna kal vek turin mipui an sawm a ni.

A hmun chungchangah harsatna a awm avangin kuminah season khar thei lo turin MiMSA chuan ruahmanna a siam hman a. Mahse, an duh ang hun December tirah championship hmawr bawk a nih leh theih dawn avangin an phur hle - rider, driver leh team-te pawh phur takin an inpuahchah a, 2025 chhunga inelna hrang hranga season champion chin fel nghal a ni dawn a ni.