South America champion Flamengo

Brazilian club Flamengo chuan nimin khan South America Champions League, Copa Libertadores final-ah 1-0 in Palmeiras an hneh a, champion nomawi an chawi.

Flamengo tan Danilo chuan inkhela goal awmchhun a khung a, a team champion pui nan a tawk - kum 34 mi Danilo hi Real Madrid, Manchester City leh Juventus defender hlui kha a ni a, January 2025 khan Flamengo hi a zawm.

Danilo-a'n an ram club a zawm kumah Copa Libertadores nomawi a chawi nghal - Palmeiras tan Barcelona forward hlui Vitor Roque chuan si phurh sutna remchang nei mah se a chhawr lo a, Flamengo zawk an champion ta.

Kum 2021 final-ah khan team pahnih hi lo intawng tawhin, 2-1 in Palmeiras an chak a, tunah chuan Flamengo-in phuba lain, South America champion an ni ta.

Flamengo coach hi Chelsea leh Atletico Madrid left back hlui Filipe Luís kha a ni a, kum 40 mi coach hian September 30, 2024 aṭang khan an ram club hi a enkawl ṭan.

Kum hnih pawh Flamengo a enkawl tlin hmain Copa do Brasil, Supercopa do Brasil , Campeonato Carioca (Rio de Janeiro state league) leh Copa Libertadores-ah te champion nomawi a chawipui thei.