Messi hoin Eastern Conference title an la

Lionel Messi chuan nomawi tam tak a kawl khawm tawh chu belhchhah theihna remchang a nei dawn - nimin zing khan Inter Miami chuan New York City 5-1 a hnehin Eastern Conference title an la a, MLS Cup final an lut zui nghal bawk a ni.

Eastern Conference playoff-ah Inter Miami hi an chungnung hle a, mualneitu Miami tan hian Tadeo Allende chuan hattrick a siam bakah Mateo Silvetti leh Telasco Segovia te chuan goal khat ve ve an khung bawk.

Messi-a'n goal khung lo mah se sulhnu ropui a hnutchhiah. Messi hian Tadeo Allende-a goal khung tur a siamsak a, vawi 405 tehmeuh mai a ṭhiante goal khung tur a siamsak tling ta a ni.

Assist neih tam lamah Messi hian vawi 404 neitu Ferenc Pukas a lehpel ta chiah a, football khel tawh zingah ani aia ṭhiante goal khung tur siamsak tam an awm lo, a la siamsak belh zel pawhin a rinawm.

Inter Miami coach Javier Mascherano chuan, "Leo hi chuan tun hma lama kan la hmuh loh leh hriat ngai loh rawn chhawpchhuah tur hi a nei zel a, team ṭha lehzual zawkah min siam a ni," tiin Argentina leh Barcelona tana a khelhpui ṭhin chungchang a sawi.

MLS Cup playoff bikah Messi hian goal 13 a thawk chhuak, goal ruk a khung bakah a ṭhiante khung tur vawi sarih a siamsak a, player langsar ber a ni. Inter Miami hian tun hma lama an la tih theih ngai loh MSL Cup lak an tum chhunzawm dawn.

Western Conference playoff lamah Vancouver Whitecaps chuan San Diego FC chu 3-1 a hnehin title an la ve bawk a, Bayern Munich forward hlui Thomas Muller-a awmna Whitecaps hian December 6, Inrinniah Inter Miami hi an tlawh ang.

Kum 36 mi Muller chuan, "Final kan khelh tur hi Messi leh Muller inbeihna a ni dawn lo. Inter Miami leh Whitecaps a ni dawn zawk. Khawvela player ropui ber kan hmachhawn dawn a ni a, keini lamin team ṭha tak kan nei thung," a ti.

Inter Miami leh Whitecaps ten MLS Cup final an khelh hmasak ber tur ve ve a ni ang.