Arsenal el turin City an ṭha tawk lo?

Manchester City-in Inrinni zan khan Leeds United 3-2 in an hneh a, Pep Guardiola hote hian Etihad Stadium-ah point thum hlawh chhuak mah se an chak dan thlirin tun dinhmunah hmahruaitu Arsenal an el turin an ṭha loah a ngaih theih. City hian match 13 aṭangin point 25 an hmu a, Gunners hian nizana Chelsea nena an result chhiar tel loin point 29 an hmu tawh thung.

Pep-a hote hian match hnih a zawna an chak loh hnuah Leeds lakah Phil Foden hmanga minute khatna leka an khung hnuah Josko Gvardiol hmangin khung belh mah se mikhual team-in Dominic Calvert-Lewin leh Lukas Nmecha te hmangin an sut zo. Point hloh thei dinhmuna ding City tan Foden a rawn inlar a, injury time-ah chakna goal a khung. City-in an duh ber point thum an hlawh chhuak a, an khelh dan erawh champion zia a ni lo thung.

A goal hma

City-in goal hmahruai khung turin second 59 lek an mamawh a, Bernardo Silva leh Matheus Nunes ten Leeds tlarhnung ṭhiatin Nunes-a cross chu Foden-a'n goal-ah a chantir nghal. Pep-a hoten inkhel an thunun zui a, chance pawh an insiam chho deuh mawlh mawlh.

Minute 25-naah City-in corner kick hmangin ṭangkaiin Gvardiol hmangin an khung belh a, Leeds tlarhnung a phui tawk lo. First half-ah City an chungnung a, goal khungna chance pawh an ngah mah se tlarhma an hriam tawk lo. Erling Haaland a reh viau bawk.

Leeds hun

First half-ah City-in champion zia an lantir a, second half-ah erawh tun hnaia City tho an ni a, an tlarhnung a phui tawk lo. Ṭan phatah City keeper Gianluigi Donnarumma-a'n hna a nei nghal a, minute 49-naah Dominic Calvert-Lewin hmangin Leeds-in siphurh an sut ṭhen. City right back phuahchawp Nunes-a'n ṭum hnih a tisual hman.

Goal khat vangin Leeds an phur a, Gvardiol lakah Calvert Lewin-a'n penalty a hlawh chhuak. Lukas Nmecha penalty pet chu Donnarumma-a'n dang mah se per chu Leeds forward hian a khung tho a, minute 68-naah 2-2 a ni.

A hunah Foden

City-in chak tumin na takin an nawr a, Leeds-in goal venhim hna an thawk. Haaland pawhin chance a nei a, a vanneih zan a ni loh bakah goal venhim lamah a thawh hlawk.

Haaland-a goal khung theih loh zanah City-in 'hero' an mamawh a, mamawh hun taka rawn inlar chu City academy chhuak Foden a ni. English forward hian box chhunga rilru fim pumin a thiam thil a rawn pholang a, injury time-ah chakna goal a khung. Leeds-in hun tawp hmain chance nei leh mah se Italian keeper Donnarumma a rintlak a, City an ṭangtluan. Foden-a'n City a chakpui.

Engtin zel?

Man City-in season liam taa nomawi an chawi loh hnuah ngai an la awh leh lo a, khelh ṭhat ni ṭhin mah se khelh chhiat ṭum a awm leh ṭhin. Leeds laka an chak dan champion zia tia sawi theih ni mah se season pum thlirin champion zia an hloh rihah a ngaih theih.

Chutihrualin Nmecha-a'n siphurh a sut hmaa chak duh vanga an chet dan erawh Leeds manager Daniel Farke a lawm lo. Donnarumma enkawl a ngai a, Pep-a'n remchangah lain player-te ko khawmin minute hnih chhung an khelh dan tur a hrilhfiah. Farke-a'n Italian keeper hi na derah a ngai a, mahse thil thleng tur erawh a thleng tawh a, City an chak.

Kar laihawlah Premier League inkhel a awm lehnghal dawn a, City hian November 2, Thawhlehni zan dar 1:00-ah Tottenham hnehtu Fulham an hmachhawn ang.