Barcelona tual lenna a chung ber!

Spanish La Liga hmahruaitu chu Barcelona an ni - Chelsea hneh loa Champions League-a mualpho hlim Catalan club hian an mikhual Alaves chu 3-1 in an hneh a, table chung ber an luah nghal.

Barcelona tan Dani Olmo chuan goal hnih khungin, Lamine Yamal chuan goal khat a thawh ve bawk a, Alaves tana inkhel ṭantirtêa Pablo Ibánez goal khung chu a tawpah chuan scoreline cheimawina mai a ni.

Catalan club-in Camp Nou-a an kir hnuah a zawnin hnehna an chang a, La Liga hmahruaitu an ni. Mahse, nizan khan Real Madrid an inlan ve leh a, Madrid khaw club hi an chak chuan Barca hi table-ah pahnihna an ni zui ang.

Barca inlan hnuah Atlético Madrid inlan ve lehin, Real Oviedo chu 2-0 in an hneh a, Alexander Sorloth chuan goal hnih a khung - Thawhlehni zanah Barca leh Atletico hi league match khel turin an intawng zui dawn.

Barakhaih

Barcelona hian an stadium chei ṭhat a nih avangin hun rei tak chu Camp Nou an hmang thei lo a, kar hmasa khan an khelmual hmingthangah hian kirin, an mikhual Athletic Bilbao chu 4-0 in an sawp nghal.

Mahse, Catalan club boruak ṭhat chhung a rei lo. UCL-ah Chelsea chu 3-0 in an ngam lo zui a, an mualpho hle. Inrinni zan inkhelah pawh an mualpho nawn dawn niin a lang hman.

Alaves midfielder Pablo Ibanez chuan minute khatna lekah Barcelona a barakhaih a, La Liga-a match 100 a khelh tlin zanah hian goal hmahruai a khung - Camp Nou an inring hman lo a ni ber!

Mahse, Barcelona hi an hnufual chhung erawh a rei lo. Minute riatnaah Lamine Yamal a inlar ve leh nghal a, Spanish forward hian Robert Lewandowski siamsak chu si phurh sutna goal ni turin a khung.

Barca an vul

Catalan club-in rang takin si phurh an sut a, an hawikir leh tawh lo - minute 26-naah Dani Olmo kan hmu a, captain Raphinha siamsak chu hmahruaina goal ni turin a khung.

Raphinha hi rei tak hliam vangin a chawl a, Bilbao lakah khan bench aṭangin a lo kir a, Chelsea lakah pawh bench aṭangin a lut. Inrinni zanah erawh inkhel bul a ṭan leh ta a, assist a nei nghal bawk.

Barcelona-in goal dang an khung zui mai loh avangin fans an hlauthawng a, mahse, hun pek belh minute thumnaah Olmo bawk inlarin, Spain international hian chak nemnghehna goal a khung.

Catalan club hian La Liga-a an match hnuhnung 34-ah goal an la khung vek a, hetih chhung hian goal 91 an khung. February 2019-a Ernesto Valverde enkawlna hnuaia match 37 a zawna goal (99 goals) an khung hnua La Liga-a goal an khung zawn rei ber record a ni.

Atletico an kal zel

Diego Simeone-a nauten an harhtharna chan an chhunzawm zel a, Real Madrid leh Barcelona tan ngaihthah thiang lo an nihzia an pholang leh ta - Real Oviedo lakah 2-0 in an chak.

Atletico boss Simeone-a'n Thawhlehni zana Barcelona nena an inkhel tur a hre ran a, hei vang hian bench lamah an goal khungtu ber Julian Alvarez hoin Pablo Barrios, Giuliano Simeone leh Jose Maria Gimenez te chu bench lamah an awm.

Mahse, heti chung hian Madrid khaw club-in harsatna an tawk lo a, Alexander Sorloth chuan minute 16-naah goal hmahruai khungin, minute 26-naah a belhchhah leh a, he goal hnih hi Atletico-in an chakpui.

Madrid khaw club hi La Liga-ah match ruk ngawt a zawnin an chak ta a, hemi hma league match riatah khan match thum chiah an chak - vawi li draw in, vawi khat an tlawm a, tunah chuan champion an sawi ri ve leh ta.