Lazio hnehtu Milan an sang

Inrinni zan Serie A inkhelah AC Milan chuan an mikhual Lazio chu 1-0 in an hneh, goal awmchhun hi Rafael Leao-a'n a khung niin point thum hmuh nan a tawk a, nomawi chawi tuma an kalna kawngah hmalam an pan zel.

San Siro-a inkhelah chawlhlawk hmain goal a lut lo, second half ṭan aṭanga minute rukna lekah Rafael Leao hian Fikayo Tomori hnen aṭanga a ball hmuh chu goal atan a chantir a, anmahni goal lam an venghim tluan bawk.

Lazio lamin penalty an beisei an hmu lo. Alessio Romagnoli-a ball pet chuan Strahinja Pavlovic-a ban a fuh ngei niin a lang a, mahse video assistant referee (VAR) hmanga an en hnuah penalty an pe lo - Lazio player lam an lungawi lo a, mahse awmzia a nei thei lo.

VAR hmanga en a nih lai hian boruak a sosang viau, khelmual sirah Milan coach Massimiliano Allegri pawh a awm mai mai thei lo - a ṭawngkam mawi lo leh chet dan uchuak avangin hnawhchhuah a ngai hial.

Milan coach Max Allegri chuan, "Tun season Serie A match kan khelh hmasak ber khan Cremonese kan hneh lo, khami ṭuma match referee tho kha tun ṭuma mi kha a ni a, thutlukna mak leh kan tana ṭha lo tak tak a siam leh thei tih ka hria.

"VAR an hman hun chhung pawh kha a rei, penalty pek lohna turah pek dan an zawng ni berin ka hria," a ti a, referee Giuseppe Collu nen an inkar boruak a ṭha tehchiam lo tih a hriat theih a, a tuartu zawkah ṭangin red card a hmu a ni.

Milan hian Serie A match 13 an khelh aṭanga point 28 hmuin hma an hruai lailawk a, pahnihna AS Roma aiin point khatin an hmu tam - match khatin an khel tam thung. Maurizio Sarri enkawl Laizo erawh point 18 hmuin pariatnaah an awm.

Serie A inkhel dangah Juventus chuan an mikhual Cagliari chu 2-1 in an hneh. Old Lady goal pahnih hi Kenan Yildiz-a khung niin, a goal khung karlakah hian Cagliari tan Sebastiano Esposito chuan goal khat a khung ve bawk.

Juventus coach Luciano Spalletti chuan, "Khelmual chhungah thil ropui tak tak kan ti hran lo, mahse player tin milin kan khel chhuak. Kan theihna san dan tawk kan inhre tlang a, midang tana khelhpui nuam tak ni turin kan infuih nasa.

"Team kan nih chuan inpumkhat taka kan chet a ngai, tun ṭumah pawh khan chutiang chu kan hmu," a ti a, a naute khelh danah a lungawi rualin, hmasawnna lai tur an la ngah hle tih a sawi bawk.

Turin club hian nghet taka khelh an la nei thei meuh lo, team lian danga elphak tur chuan hmasawn ngaihna lai an la ngah. Pasarihna an ni mek a, hmahruaitu Milan an phak lohna chu point nga a nih avangin an tan nomawi beiseina a la bo lo.