Monaco lakah PSG an chak lo

Ligue 1 champion lai leh hmahruaitu ni bawk Paris Saint Germain chuan ngam loh an tawng. Inrinni zan khan Paris club hian an mikhualna ramah AS Monaco chu 1-0 in an hneh lo.

Luis Enrique naute hi tun season chu an la kal fal thei rih lo. Stade Louis-II-ah pawh an hmatawngten goal an khung thei tlat lo a, minute 68-naah Takumi Minamino chuan goal awmchhun a khung.

Japan international hian Aleksandr Golovin hnen aṭangin ball a hmu a, yard 16-a hla aṭangin goal kilah a pet lut. Hun tawp dawn lamah Thilo Kehrer hnawhchhuah a ni a, an tam zawk hnuah pawh PSG an che thei lo.

Thilo Kehrer hi Ibrahim Mbaye laka a chet dan avangin hrem a ni, video assistant referee (VAR) an hman hnuah an hnawt chhuak. Hun tawp lam minute 10 chhung chu Monaco hi player kim loin an khelh a ngaih phah a ni.

PSG manager Enrique chuan, "Tihsual kan ngah a, a tawpah kan tuar ta a ni. Thil awlsam leh harsa vak loa chinfel theih tur pawh kan tisual nasa, team ṭha Monaco laka tihsual neih tam chu a pawi thui tih a takin kan hmu.

"Inkhel pumpui kha thlir chuan chak zawk nih kan phu lo. Tun ṭumah hian chak lo mah ila kan chhe ta duai tihna erawh a ni chuang lo, match lehpek aṭang chuan thatho takin kan khelh leh theih nghal ka beisei," a ti.

PSG hian point 30 hmuin hma an hruai mek a, anmahni hnaih bertu Marseille aia an san zawkna erawh point khat chauh a ni thung - match khat lekah an dinhmun a danglam thei tihna a ni.