Zanin dar 11:00-ah Manchester Derby

Manchester United manager Ole Gunnar Solskjaer chuan zanin dar 11:00-a an hmachhawn tur Manchester City chu 'England-a team ṭha ber' tiin a chhal. Norwegian manager thusawi dikna hi table-ah a lan avangin Manchester Derby intluk tawk ṭum a ni dawn lo.

Amaherawhchu, United hian tun season-ah big club lakah chak loh an la nei lo a, Man City tan record hriat nuam a ni lo. Pep Guardiola hote hian an nomawi kawl lai chuhpuitu Liverpool nen an inkarah point 11 zet a awm tawh avangin draw pawh a pawi dawn a, hei hian inkhel en a ti châkawm takzet.

Manchester United-in Tottenham an hneh zawh chiah avangin an phur lai tak a ni a, goal hnih khungtu Marcus Rashford chanchinin sawi a hlawh. English striker hian club lian lakah goal a khung thei hle. Tun season-ah Rashford hian Chelsea lakah goal li a khung tawh a, Tottenham lamah goal hnih khungin Liverpool lakah goal khat a khung. Arsenal lakah Rashford hian goal khung lo mah se Scott Mc Tominay-a goal khung tur a siamsak.

United manager Solskjaer chuan, "Rashford hian goal khung hi ngaiah a nei chho ṭan a, vawi khata khung vaka reh leh vang vang ang a ni tawh lo. Spurs nen khan a khel ṭha tak zet a, khatiang bawk kha kan beisei leh a ni," tiin a sawi. Derby chungchang sawiin Solskjaer chuan, "Tunah chuan derby hi kum tinin khelh a ni ta a, kei chuan derby khel tur hian ka nghak rei hle. Man City hi team ṭha zawk an ni a, derby erawh derby a nihna ang takin kan khel ang. A ṭul chuan tackle rum deuh pawh a awm tur a ni a, football hi basketball te nen a inang lo," tiin huaisen taka an khelh tur thu a sawi.

Man City hian Eithad Stadium-a league match hnuhnung 26 an khelhah vawi 23 an chak a, vawi khat inhnehtawkin vawi hnih chiah an chak lo. Solskjaer erawh manager nghet a nih hnuah khualmuala league match 10 an khelhah vawi khat chiah an chak a, record thlirin chak tura rinkai zawk an awm nghal.

Premier League champion lai hian an match hnuhnung berah Burnley 4-1 in an sawp a, Bernardo Silva thiamzia a lang. Hei chauh hi ni loin Sergio Aguero inhliam vangin awm lo pawh ni se Gabriel Jesus-a'n goal a khung thei tih a chiang a, David Silva leh Kevin De Bruyne te United tan an hnawksak ang.

United erawhin hliam vangin Paul Pobga an la chhawr thei dawn lo a, Anthony Martial a dam tawh. Chutihrualin France forward Martial hian Man City tlarhnung  tibuai tur khawpin ball ṭha a chang em tih erawh zawhna awm thei a ni.