NorthEast Derby-ah Aizawl FC chak lo

Aizawl FC chuan nimin khan NorthEast Derby-ah Neroca 1-0 in an hneh lo - Manipur club hian goal zawnah vawi khat chiah an pet!

Imphal-a inkhelah mualneitu goalkeeper Marvin Devon Phillip chu man of the match-ah thlan a ni a, Standly Rosario hote an vanduai. Mizo club hian Goa an pan lehnghal ang a, December 9 hian Tilak Maidan-ah Indian Arrows an hmachhawn dawn. 

Aizawl FC hian December 11 hian RG Stadium-ah Chanmari FC nen MPL semifinal second leg an khel bawk ang.

Neroca-in Mizo tlangval Zodingliana an kawl a, Shillong Lajong midfielder hlui hi an chakna kawngah a ṭangkai hle. Inhliam vanga hun rei tak buai tawh Adinga hian minute 29-naah freekick ṭha zetin a pet a, crossbar per mah se hemi per hi Ousmane Diawara-a'n goal-ah a chantir.

Gift Raikhan-a enkawl Neroca hian chance ṭha dang pawh an nei a, forward Khaiminthang Lhungdim-a'n goal khungna hun ṭha a hlah a; amaherawhchu first half hun chanve hma lam bak an khel ṭha lo.

Aizawl FC-in an forward thar Abdoulaye Kanoute bul an ṭantir a, Mali striker hi palian mah se beisei a pha lo. Standly hote hian Kanoute sanna hman ṭangkai ṭumin ball an vawrh nasa a, an ball pet a dik tawk loh bakah Kanoute goal bawh a na tawk lo a, ball kâng a chang hleithei lo.

Chutihrualin Aizawl FC hian chance ṭha tak tak an insiam tho a, William Lalnunfela'n ball a dan ṭhat loh avangin hun ṭha a hloh. Midfielder Paul Ramfangzauva freekick pet chu keeper Marvin-a'n ṭha zetin a dang a, Kolasib tlangval hian injury time-ah crossbar a pet per bawk.

Aizawl FC vanduai ṭumah hian defender Richard Kassaga ball tauh kawh ṭha zet chu goalline aṭangin Neroca player-te'n an dang. Mizo club-in 57% zet ball chang mah se goal an khung miau loh avangin khualmuala an match hmasa berah point an hlawh chhuak lo. Aizawl FC winger an hmuhnawm a, a bikin Isak-a'n vawi tam tak ball ṭha a lalut a, a hmawr bawktu tur an nei ṭha tawk lo. Aizawl FC goal chhuah hi freekick ṭha tak ni bawk mah se, defender-te'n an tih tur an ti tawk lo bawk.

Vawiin tlai dar 2:00 hian East Bengal-in Punjab FC an tlawh dawn a, Red and Gold hian an match hmasa berah Real Kashmir 1-1 in an inhnehtawkpui.

Kolkata club-ah hian keeper Lalthuammawia'n bul a ṭan a; Lalrindika Ralte, Brandon Vanlalremdika leh PC Rohlupuia te an awm. Didika hi khup hliam vangin squad-ah a la tel thei dawn lo a, Mizo dang pahnih hi match hmasa berah khelhna hun pek an ni lo.

Mohun Bagan chuan an match hmasa bera Aizawl FC goal awm loa an draw hnuah Churchill Brothers an hmachhawn dawn. Punjab FC 3-0 a sawptu Churchill lamah hian Aizawl FC striker hlui Lalkhawpuimawia a khel a, Kelkang tlangval hian an match hmasa berah goal hnih a khung a ni.

I league

Nimin Inkhel Result

Neroca    1 - 0    Aizawl FC

NER : Ousmane Diawara 29'

Vawiin Inkhel Tur

Punjab FC    2:00 PM    East Bengal

December 8, Pathianni

Mohun Bagan    5:00 PM    Churchill Brothers