Real Madrid-ah Bale a hlim lo

Chanchin ngah tak Gareth Bale-a'n chanchinthar a neih belh leh ta a, Welsh forward agent Jonathan Barnett chuan a player hi Santiago Bernabeu-ah a hlim loh thu a sawi. Chutihrual chuan January transfer-ah Bale hi a chhuak ngei dawn tihna a nih chuan loh thu a sawi a, Barnett chuan, "Gareth hian engtiklaimahin chhuah a dil ngai lo," a ti.

Bale-a'n Real fan-te nen buaina a nei sa a, nipui transfer laiin Zinedine Zidane nen an inkarah boruak a awm tawh bawk - tunah a agent berin a hlim loh thu a sawi leh ta. Barnett chuan, "Bale hian Real nen contract a nei mek a, he hmuna cham tura an duh chhung chuan buaina a awm lo ang," a ti zui a, a thusawi hmasa nena ngaihtuah erawh chuan awih mai a harsa. 

Nipui transfer bazar in hawn laiin Bale ngaina lotu Zidane-a'n, "A chhuah hi tu tan pawh a ṭha vek," tiin a sawi a, player mahni induhtawk ve tak chin tan pai daih harsa tak a ni. Bale-a'n a kum a tam ve ṭan tih hriain China lam a hawi zui a, Chinese Super League club Jiangsu Suning chuan kar khatah pound maktaduai khat hlawhtir an inhuam. 

Welsh forward a pem ṭep tawh tihah Real Madrid-in transfer fee an phut thut a, Bale-a chhuahna tur kalkawng an dang - Tottenham Hotspur forward hlui hi Real-ah a cham zui. Bale-a'n a tum angin Real a chhuahsan thei lo a, kawhmawh a bawl zui - hliamin a tihbuai karah Wales tana a inkhelhna lamah Real a tih el a, a thawm a la dai lo. 

Bale-a'n Wales tana a banner ken kha kan la hre furin a rinawm - Madrid aia Wales leh golf a ngaihpawimawh zawk thu a ni a, Spanish media leh Real fan-te an thinrim hle. Mahse, Barnett chuan thil thleng chu Bale-a'n fans leh Real Madrid a tih elna ni loin Spanish media a chhanletna a nih thu a sawi. 

Bale-a agent chuan, "Media ho hian Bale chanchin pawh hre chuang mang loin an duh duh an ziakin an puangzar a, he thil thleng ninawm tak chhanlet nan Bale khan a ti a ni," a ti. Welsh forward chu player ṭawngtam lo leh media hmachhawn tlem a nih thu a sawi bawk a, "Khelmuala a hnathawh zawk hi en rawh se," tiin a chhehvel thila buai reng lo turin mipui leh media a chah. 

Barnett chuan, "Khelmuala Bale a awm chuan Real tan chak theihna chance a sang a, nomawi chawi reng duh mi a nih avangin Real-ah hlim viau lo mah se a khelh dan a tibuai lo ang. "Bale hian 100% hlir a pe ṭhin a, 100% a a khelh chuan Bale hi khawvela player ṭha ber pawl a la ni reng a ni," a ti a, thlasik transfer hnaiha a player a fak dan enin hralh a pawiti lo tih a lang. 

Hriat tel tur erawh Bale hi Real-ah pawh player hlawh hnem ber pawl a ni a, a chhuak a nih chuan nipui laia pan a tum CSL lamah tho a kir beiseina a sang hle. Barnett chuan, "Bale hi a chhuak ngei ngei dawn tiin ka sawi thei lo. Mahse, sawmna a awm a, a phurna lam a nih chuan Real Madrid President nen pawh sawidun a ṭha ang chu," a ti. 

Real Madrid player leh assistant coach hlui Aitor Karanka chuan, "Real Sociedad nen an inkhelh ṭuma auh el a tawh dan kha nasa tak a ni a, a mak zawk. "Mahse, a khelhpui ten Bale hi an sawisel ngai lo a, a bula khelh hi nuam an ti em em zawk. Team tana Bale pawimawhzia hi an hre vek a ni," a ti a, Real-in Bale an mamawh thu a sawi. 

Bale-a khelhna Madrid hian vawiin tlai dar 5:30-ah league match khel turin Espanyol an mikhual dawn a, zan dar 1:30-ah Barcelona chuan RCD Mallorca an mikhual ve bawk ang. Barcelona leh Real hi an point neih zat a in ang mek a, head-to-head chu point inang tehna ni mah se El Clasico khelh a la nih loh avangin goal difference-a dinhmun ṭha zawk Barca hi table chung berah an awm mek.

Zanin inkhel tur

Real Madrid    5:30 PM    Espanyol

Granada    8:30 PM    Deportivo Alavés

Levante    11:00 PM    Valencia

Barcelona    1:30 AM    Mallorca

December 8, Pathianni

Eibar    4:30 PM    Getafe

Real Betis    6:30 PM    Athletic Club

Real Valladolid    8:30 PM    Real Sociedad

Leganes    11:00 PM    Celta Vigo

Osasuna    1:30 AM    Sevilla