Blasters leh Mumbai inhnehtawk

Ningani zan khan Indian Super League-ah Mumbai City leh Kerala Blasters an inkhel a, tun hnaia beisei ang result nei thei lo team pahnih hi 1-1 a inhnehtawkin point an insem. 

Mumbai khelmuala inkhelah goal lut loin team pahnih hi an ṭin mai dawn niin a lang hman a, mahse Blasters tan Ballon d'Or dawngtu Lionel Messi ni lo zawk Messi Bouli chuan minute 75-naah goal hmahruai a rawn khung. 

Blasters-in an vanneih ṭum a her chhuak dawn niin an ngai a, mahse an beisei ang ngawt a lo ni lo - Mumbai City tana season duhawm tak hmangtu Amine Chermiti chuan si phurh sutna goal a rawn khung a, goal dang lut loin an ṭin. 

Hertha Berlin striker hlui hian tun season-a league match sarih an khelh tawhah goal li a khung a, Indian football-a a season hmasa berah a tlangnel nghal hle. Blasters tan minute 62-naah Samuel Lalmuanpuia chu bench aṭanga luhtir a ni a, Zemabawk tlangval hi ISL-a a inlan hmasak ber a ni. Lalruatthara chu bench-ah awm tawh mah se inhliam damkawr defender hi Blasters kawr hain khelmualah a la inlan rih lo.