Bayern-in Poch an beisei lo

Niko Kovac ban hnua manager nghet la nei lo Bayern Munich-in club enkawl tura an beisei zingah Mauricio Pochettino a tel lo niin German chanchinbu Bild chuan an ziak.

Bild chanchinbu-a head of football Christian Falk chuan, "Mauricio Pochettino-a'n Bayern Munich a enkawl dawn lo. Argentine manager hi Bayern manager tura 'candidate' zingah a tel lo," tiin twitter-ah a ziak a, thu rintlaka ngaih a ni.

Bayern sporting director Hasan Salihamidzic chuan Poch hi manager lailawk Hansi Flick thlak turin duh mah se club board dangin an ṭawmpui lo. Argentine manager hian kum 2014-2019 chhungin North London club-ah nomawi a chawi lo a, hmasawnna lian tak an hmu lo. 

Spurs hian Poch hnuaiah 2015 khan League Cup final an lut a, Chelsea an hneh lo. Nikum khan Champions League final hial an thleng a, amaherawhchu Liverpool lakah an beiseina a thamral. Nomawi thlir tel loh chuan Poch-a record hi a ṭha a, match 293-ah chak percentage 54.3% a nei pha a, season nga chhungin vawi li ngawt Spurs chu top four-ah ṭum li a lanpui.

Manager thar chungchangah hian Bayern treble champion pui tawhtu Jupp Heynckes ngaihdan pawh lak a ni a, ani pawh hian German ṭawng thiam lo Poch hi a awn hran lo nia hriat a ni bawk.

Bayern hian PSG manager Thomas Tuchel chu manager lailawk Flick nen inkawp turin an duh nia sawi thuthang a awm a, amaherawhchu German club beisei ber chu Ajax manager  Erik Ten Hag ni turah a la ngaih theih zel.

Inkhel pawimawh

Bavarians hian kar liam ta khan Bayer Leverkusen an hneh lo a, Flick hnuaia an chak loh hmasa ber a ni. Zanin dar 8:00-ah Bayern hian Borussia Monchengladbach an tlawh dawn a, champion lai leh hmahruai mektu inkhel a nih avangin inkhel pawimawh a ni.

Gladbach hian match 13-ah point 28 an hmu a, Bayern aiin point liin an hmu sang zawk. Foals (Gladbach sawina) hian tun season-ah goal 28 an khung tawh a, heng zinga goal 20 hi forward pali  Breel Embolo, Patrick Herrmann, Alassane Plea leh Marcus Thuram te khung a ni.

Inhliam vanga tlarhnung phuahchawp Bayern tan dan an awlsam dawn lo. Bavarians hian Bayer Leverkusen an hneh loh ṭumin Javi Martinez leh David Alaba te an dah kawp. Martinez hi defence laiah chhawr theih mah se midfield angin a lar zawk a, Alaba pawh left wing back angin hming a chher zawk.

Coach Marco Rose erawhin tlarhnungah hman bik a nei a, player inhliam an neih loh hian rah ṭha a thlen. Tun season-ah goal 15 chauh an la chhuah a, pakhatna dinhmun an hauh theihna chhan pawh a ni. Chutihrualin Bundesliga a nih tawh chuan Bayern aia ṭha a awm theih rih lo a, manager lailawk Hansi Flick tan season tawp thleng emaw manager nghet thleng pawha team enkawl a duh chuan chak ngei ngei a ṭul ang.