Leeds hmachhawn thei tur Palmer

Chelsea-in zanin dar 1:45 hian Leeds United an hmachhawn dawn a, London club tan inhliam vanga hun rei tak khel tawh lo Cole Palmer inlan ngei tura rin a ni. Blues hian match 13 aṭangin point 24 an hmu a, pathumnaah awmin champion beisei ngam zingah an tel.

Enzo Maresca hote hian match hnuhnung berah player 10-a khel chungin hmahruaitu Arsenal an chelh thei a, Leeds lakah pawh inrintawkna an nei sang dawn. FIFA Club World Cup an champion ṭuma player pawimawh Palmer pawh Gunners lakah squad-ah a awm tawh a, minute 90 la khel thei lo mah se a inlan tawh ngei rin a ni.

Mahse, Chelsea hian Arsenal an hmachhawn ṭuma hnawhchhuah Moises Caicedo an chhawr thei dawn lo a, midfielder pawimawh hian hrem vangin match thum a khel thei dawn lo. Chutihrualin Blues squad a chhah ṭha a, Romeo Lavia a la inhliam chungin Andrey Santos leh Josh Acheampong chhawr theih turin an awm.

Chelsea boss Maresca chuan, "Leeds hi hriatthiam an har hle. Daniel Farke hian defender paliin an khel char char a, City nen khan second half-ah defender panga a hmang. An khelh dan chi hnih hmachhawn thei turin kan inpuahchah a ngai," tiin a sawi.

Mak ang reng tak erawh Chelsea hi an mual aiin khualmualah an che ṭha zawk a, Elland Road-ah pawh inrintawkna an nghat dawn. Leeds hian match li chhung chak hmel an hmu tawh lo a, chutihrualin City pawhin Farke hote lakah point thum hmuh an harsat tih a hriat a ṭha. Premier League-ah chak chiang sa tih a awm thei lo.