Ramsey dinhmun a chiang lo

Juventus chuan zanin dar 1:15 hian tun hnaia khel ṭha tak Lazio an lenchilh dawn a, inkhel pawimawh takah hian midfielder Aaron Ramsey chu a inlan thei dawn em tih a chiang lo.

Arsenal player hlui hi Ningani tlai khan training-na hmunah a inhliam a, a malpui vei lamah hliam tenau a nei - a chawlh rei erawh a rinawm loh, nizan khan a dinhmun hi endik zui leh a ni. Forward Cristiano Ronaldo erawh a dam chiang tawh. Portuguese forward hian Serie A Player of the Year chawimawina a dawn hnua a match hmasa berah a team chak pui a duh ang. Giorgio Chiellini, Marko Pjaca, Adrien Rabiot leh Douglas Costa te erawh an la inlan thei dawn lo.

Juve hmachhawn tur Lazio hian tun hnai Serie A match ruk chhung chu hnehna an chang vek, point 30 neiin pathumna an ni mek. Juve hi pahnihna an ni thung a, an chesual a nih chuan hmahruaitu Inter Milan tan kal fal theihna hun a ni thung ang.