Mipui mit fukna tur Kohli

Vawiin chawhnu dar 1:30 hian New Raipur-ah India leh South Africa ten ODI match thum an khelh tura vawi hnihna an khel dawn. Men in Blue hian match hmasa berah Virat Kohli-a'n century a siam zarah hnehna an chang a, vawiina hnehna an chang a nih chuan match khat khelh hmabak nei chungin series an la ang.

Kum 33 mi Kohli hian Ranchi-ah match hmasa ber khelh ṭumin all 120-ah 135 runs a siam a, ODI bikah century siam tam ber record kawltu niin vawi 52 a siamna chiah a ni.

Kohli hian cricket inelna chi thuma chi khata century siam tam ber record a siam. Tendulkar hian Test-ah century vawi 51 a siam a, Kohli hian ODI-ah century vawi 52 zet a siam zarah India cricket legend record hi a khum.

Chutihrualin vawiin lamah erawh Test match-a an ngam loh South Africa lakah ODI hmangin phuba an lak a ṭul a, player naupang chhuak thar zingah tawnhriat ngah pahnih Kohli leh Rohit Sharma te pawimawhna a lan leh ngei a rinawm. Nakkum hian T20 World Cup khelh a ni dawn a, Kohli leh Rohit te hi India squad-a la tel tura ngaih an ni.