DR Congo-in Wissa an en kân

Africa Cup of Nations khel tur DR Congo chuan an player neih langsar ber pawl Yoane Wissa chu squad-ah an telh lo a, Newcastle United striker tel lo hian an ṭha tawkah an inngai.

Chutihrual chuan Congo thutlukna hi a hriatthiam awm viau - Wissa hian nipui transfer lai khan Magpies hi pound maktaduai 55-in a zawm a, mahse, international break-ah inhliam zuiin, tun season-ah Magpies tan a la inkhel lo.

Tun hnaiah Wissa hi dam tawh mah se, DR Congo hian a hlawh petu Magpies chhuhsak leh nghal hi an duh lo ni berin a lang a, Newcastle tan chuan AFCON laia an player lei thar an chân lo tur hi thu lawmawm a ni ang.

Congo tana match 35-a goal riat khungtu Wissa hian season hmasa khan Brentford tan inelna hrang hrangah match 39 khelin goal 20 a khung a, Magpies hian Alexander Isak chân thei dinhmuna an din khan an rim zui.

Premier League-a tlangnel sa forward hi an duh angin chhawr thei nghal lo mah se, Germany lam aṭanga an lakluh Nick Woltemade a che ṭha nghal a, Magpies tan inelna hrang hranga match 14 bul a ṭan aṭangin goal sarih a khung.

Newcastle hian nizan khan Tottenham Hotspur hmachhawnin league match an khel a, an result kan hre hman lo.