A hun a thleng dawn ta - Joshua vs Andy Ruiz II

Boxing khawvel ngaihven hlawh Anthony Joshua vs Andy Ruiz Jr. 'rematch' chu Pathianni zing hian neih a ni dawn ta a, boxing ngainatu ten Saudi Arabia lam an hawi ang. 

WBA, IBF leh WBO world heavyweight title chuhna inhnek hi Pathianni zing dar 2:30 aṭangin en theih a ni dawn a, he thu buatsaih a nih thleng hian India rama an pekchhuahna tur hriat theih a la ni lo. 

Diriyah Arena, Saudi Arabia-a Joshua leh Ruiz intawng tur hi an vawi hnih intawnna tur a ni a, June thla khan a vawi khat nan lo intawng tawhin Ruiz hian Joshua a barakhaih. British boxer Joshua tlawm-ngaiin rematch neih leh theihna dan an neih chu a bawhzui nghal a, Inrinni zan, keini lam sanaa Pathianni zingah an intawng leh dawn ta. 

Tun hnaia infiamna khawvelin sum tam vanga a bawh nasat Saudi Arabia-ah fight hmuhnawm phochhuah a ni dawn a, boxer pahnih pawh an hausak belh lawih dawn. Hetihlai hian boxer pahniha hming langsar zawk Joshua chuan a let fein sum a lalut hnem zawk dawn a, khawthlang media-te tarlan dan chuan Joshua hian pound maktaduai 40-60 inkar a hlawh ang!

Hetihlai hian WBA, IBF leh WBO heavyweight title kawl mektu Ruiz chuan pound maktaduai 7.7 bawr vel bak a hlawh dawn lo - Joshua hlawh tur aṭanga tehin tlem mah se uanpui tham sum erawh a la ni tho. Pay-per-view aṭanga sum hmuh danin boxer sum hlawhchhuah tur hi a la ti danglam leh thei dawn a, ṭhenkhat chuan Ruiz hian pound maktaduai 10 tal a hlawh phak an ring. 

June thlaa Anthony Joshua-a'n Ruiz a hmachhawn hma khan vawi 22 inhnek a hmachhawnah chak loh a nei lo a, a khingpui zinga 21 a knockout thei. Mahse, khawvel mak tih turin Ruiz-a'n a kuttumin Joshua a deng a, boxer dang ang lo taka sek phiar tak ni lem lo Ruiz-a'n heavyweight boxer ropui ber pawla insiam chhoh tum Joshua a tukdawl!

Kum 30 mi Joshua-a'n thilmak thlen nawntir a tum tawh lo. Ft 6 leh 6 in-a sang boxer chuan, "Sakawrin a ke hnung lama mi a kheng ṭhin ang mai hian ka hnek ṭhin," a ti a, Ruiz vau zam a tum. Joshua chuan a thawhrim avanga a rihna thlenga a tlakhniam thu a sawi a, Ruiz nena an inhnek hmasak khan kg 112 vel a ni a, tunah erawh kg 105 hnuai lam a nih a rin thu a sawi. 

Kum 30 mi Ruiz hian inhnek a hmachhawn tawh vawi 34-ah vawi khat chiah chak loh a la nei a, a ngam loh hi Joshua ngam lotu Joseph Parker a ni. Ruiz hian Joshua lo hneh tawh ngawt mah se boxer pahnih sulhnu thlirin Joshua chu dah san zawk loh theih a ni lo a, vawiinah pawh chak tura ringtu a ngah zawk a nih pawhin a mak lo ang. 

Mahse, Mexican-American boxer hian, "Engti kawng zawng maha tlawm ka tum lo a, hlauhna engmah a awm lo," a ti - Joshua a hmachhawn thei chu, "Thil special a ni hran lo. An zinga tel ve alawm ka nih," tiin a sawi a, heavyweight boxer ṭha zingah a inchhiar tel tihna a ni. 

Joshua leh Ruiz inhneka chak zawk tan Deontay Wilder emaw Tyson Fury chu an hmaa ding leh tur an ni dawn a, boxer hralh tla pahnih an nih miau avangin sum tam takin a la hmuak dawn tih a lang nghal.