Arsenal buaina a punlun zel rih

"Chak thei lo, manager nghet nei lo, player inlungrual lo leh fans lungawi lo" heng hi tuna Arsenal dinhmun a ni! North London club ke chheh a rem hlei thei rih lo a, chhiatna leh buaina hrang hrangten a bawm mek a ni ber.

Ningani zan Premier League inkhelah Gunners fans lamin chak ni hmel hmuh beisei mah se Emirates Stadium-ah ngei Brighton & Hove Albion chu 2-1 in an ngam lo. Inkhel dangah Newcastle United chuan Sheffield United 2-0 in an luhchhuah thung a ni.

Manager lailawk Freddie Ljungberg kaihhruaina hnuaiah Arsenal chuan a vawi khat nan mikhual an thleng a, club tana match 100-na kheltu Alexandre Lacazette chuan second half tir lamah Adam Webster-a goal khung a sut.

Team pahnihte 1-1 a an inhnehtawk laiin defender David Luiz chuan an goal hnihna a khungah a inngai. Mahse, VAR hman a nih hnuah Brazil international hi a offside tih hmuh a ni a, a goal hi hnawlsak a ni.

Beisei loh tak maiin Brighton tan Neal Maupay chuan minute 80-naah Aaron Mooy cross chu a tauh lut a, khualmualah point thum hlu tak an hmu - Gunners erawh match kua ngawt chak ni hmel an hmu ta lo! 1997 hnu lama chak nei loa an kal tluan rei ber ṭum an tawng.

Arsenal player a nih tawp aṭanga kum 12 hnuah Ljungberg-a'n club a kaihruai a, player a nih laia Premier League nomawi vawi hnih chawi tawh Swede manager hi a tir lamah chuan fans lamin an lawm ṭha hle.

Norwich an hmachhawn ṭuma khel ṭha lo Shkodran Mustafi chu dah chhuakin a aiah Sokratis Papastathopoulos a dah thung - Greek defender hi a laiah Luiz nen an ding dun; tawnhriat ngah dun tawh viau mah se phawsawlhna an la nei tho.

Gunners tlarhnung chu nidang ang bawkin a phui lo a, tlarhma lam an hriam tawk lo bawk. Player manto ber Nicolas Pepe chu goal mamawh hunah bench aṭanga dahluh a ni a, Ivory Coast international hian a man phu tawkin a la khel lo chhunzawm zel.

Inkhelh banah Mesut Ozil chu striker Lacazette lam hawiin lungawi lo taka a ang hmel hmuh tur a awm a, Germany international hlui hian eng nge a sawi chiah hriat ni lo mah se a lawm lo hle tih a lang - Lacazette erawhin chhang let loin a luhsan daih.

Gunners captain Aubameyang chu inkhelh laklawh laiin 'toilet' lamah a kal bawk! Fans lamin Gabon international hi inkhela rilru pe tawk lo niin an sawisel a, manager lailawk Ljungberg erawhin, "Duhthlan tur dang a nei lo," tiin inthiar ngei a ngaih thuin a chhan thung.

Senior player-ten an lungawi lohna an lantir hi a vawi khat thlenna chauh a ni lo, heng bakah hian buaina tenau neuh neuh a thleng fo - an duh loha an hnawl tak Arsene Wenger thuhnuaia an awm lai ni se tuna an buaina ṭhenkhat hi chu chinfel chawp pawh ngai loa fel sa a nih a rinawm. Player-ten an zaha an hlauh tur manager an la nei leh rih lo tihna a ni.

Arsenal manager lailawk Freddie Ljungberg chuan, "Hun chanve hma lamah kha chuan kan zawi a, chak duhna kan nei lo emaw ni tih mai tur a ni. 'Kan khelh dan kha Arsenal a ni lo' tih hialin ka sawisel; a hnu lamah erawh hma kan sawn hret.

"Amaherawhchu, tun hnaiah kan chak loh nasat em avangin inrintawkna kan nei tlem a, dinhmun harsa takah kan awm mek a ni," a ti. Gunners hi Thawhṭanni zanah West Ham nen an inhmachhawn leh ang. Brighton boss Graham Potter chuan, "Duhthusam vek chu a ni lo, mahse hnehna chan phu khawpin kan khel ṭha a ni. Player-ten fak an phu a, an thawhrim vanga point thum hmu thei kan ni," a ti. Brighton hian Pathianni zanah Wolves an mikhual zui leh dawn a ni.

•    Arsenal hian tun season Premier League-ah an muala an khelh bikah anmahni goal zawna shot vawi 52 an hmachhawn tawh a, 2003-04 season tluana an hmachhawn aiin a tam tawh zawk. Hneh loh nei loa an champion 

ṭum khan an goal zawnah an khingpuiin vawi 48 chiah an pet thei.

•    Manager nghet leh enkawl lailawktu pawh tiamin, Arsenal manager hnuhnung panga zingah Pat Rice chiah hi an muala match hmasa bera hnehna chang thei a ni. Rice ho hian 1996 September thla khan Sheffield Wednesday a hneh.

•    Brighton hian khualmuala 'big six' club an hmachhawn vawi 17-a a vawi khat nan chak ni hmel an hmu. Tun season bikah pawh khualmuala league match ruk chung chak ni hmel an hmuh tawh loh chu a tawp chiah.