Zaninah Mega Boxing semifinal zan khatna

Sailo Agencies - MIZBA Mega Boxing 2025 semifinal chu zanin aṭangin R. Dengṭhuama Stadium, Mualpuiah khelh ṭan a ni dawn. En châkawm ṭhahnem tak zingah hmeichhe boxer TC Lalremruati (ITI Veng) leh Rudy Lalhmingmuani (Lawngtlai) te en châkawm berah a ngaih theih. Mega Boxing hi Zonet Rihnim, Empai leh YouTube hmangin a en theih ang.

TC-i leh Rudy te khelh dan a inang lo hle. ITI Veng nula TC-i hian tawnhriat a nei ṭha a, long distance boxer niin a khingpui tur Rudy hi hnaih chilh chi a ni thung. Lawngtlai nula hi thahrui a ngah bakah a rang a, inhnek hmuhnawm tak a ni ang.

50 - 55 kg category-a L. Joseph Buhhringpachhua, Siaha leh H. Lallawmawma, Lawngtlai te inhnek tur pawh en tlak viau turah a ngaih theih. Joseph hi KISCE, Aizawlah Sete-a hnuaiah training a nei a, Lawmawma hi Boxing by Rick-ah coach Zochhuanawma Fanai hnuaiah training a nei thung.

60 - 65 kg category-ah Lalnunzira, Haulawng leh Malsawmkima, Muthi te inhnek pawh inhnek tawk viau tura ngaih an ni. Haulawng tlangval Zira hian tawnhriat nei ṭha daih mah se tun ṭumah hian a fitness a ṭha tawk lo. Muthi tlangval Malsawmkima erawh SAI-a training a ni a, feet ruk zeta sang a nih bawk avangin a hnek thui a, a buk a rit hret ang.