MIZBA Mega Boxing: Justin-a khingpui tur Alison

Mizoram Boxing Association (MIZBA) buatsaih Sailo Agencies - MIZBA Mega Boxing 2025 quarterfinal-ah tun inelnaa hming chher pahnih Justin M. Lalthanpuia leh Alison M. Lalhmangaihzaua ten split decision ve vein hnehna an chang. N. Vanlaiphai tlangval Justin leh Siata tlangval Alison te hi zanin hian semfinal-ah an inhmachhawn ang.

Thawhlehni zan inhnek dangah Lalrambuatsaiha leh NT Biakthansanga ten infiammi rilru puin ring an rawn lut a, Niawhtlang tlangval Biakthansanga hi a inhliam avangin a inhnek zui ta lo. RSC hmangin Ramthar North tlangval Lalrambuatsaiha a chak.

55-60 kg category-ah Lalruatmawia leh Lalhruaitluanga ten hnehna an chang ve ve. Hnahthial tlangval Hruaitluanga hian inpal thluk vangin count-te tawk mah se Lunglei tlangval Lalawmpuia Chinzah lakah split decision hmangin a chak.

Boxer tawnhriat nei ṭha Lalkhawngaiha'n (Venghlui) BVT rawlthar Lalmalsawmkima lakah bul a ṭan ṭha a, a tawp lamah erawh an inhnehtawk hle. Mahse, Venghlui boxer Khawngaiha'n a phu angin hnehna a chang.