Mizoram aiawh tur player 20

Mizoram Football Association-in nimin khan 79th National Football Championship for the Santosh Trophy 2025-26 group stage hmachhawn tur squad an puang. Coach Lalruatliana Sailo (Tawia) enkawl team hian December 12, Zirtawpni hian inelna neihna hmun Agartala, Tripura an pan dawn a, Mizoram hi group D-ah Manipur, Mizoram, Nagaland leh Tripura te nen an awm.

Player 20 chauh

Santosh Trophy-ah hian ṭum dangah player 22 an awm ṭhin a, kuminah erawh player 20 chauh a hruai theih avangin coaching staff tan a harsa sawt dawn. Group stage-ah hian match thum chauh khelh tur ni mah se hliam/hrem an awm erawh chuan coach tan a harsa lehzual ang.

Mizoram hian match hmasa berah Nagaland an hmachhawn dawn a, group D bik hi December 15, Thawhṭannia khelh ṭan tur a ni. Match hnihnaah inelna thlengtu Tripura an hmachhawn dawn a, match tawp berah team ṭha Manipur an hmachhawn ang.

Mizoram team chu

Player 20 zingah MPL player 19 an tel a, Luangmual FC-in Robena an thawh ve bawk. Melbuk tlangval hi First Division aṭanga tel awmchhun a ni.

MLS leh Saikhamakawn ten player paruk ve ve an thawh a, Dinthar FC-in player pali thawhin Kanan FC-in player pahnih an thawh a, SYS FC-in player pakhat an thawh ve bawk.

Mak ang reng tak erawh kum danga Mizoram innghahna ni ṭhin Mizoram Police-in player an thawh lo. Chutihrualin chik lehzuala chhut chuan Mizoram tihming ṭha ṭhintu Police player-te kum lamah an upa ve ṭan a, ṭhangthar zawkte hun a inher chhuakah a ngaih theih.