Vini hi a fit ṭha tawk tur a ni - Ancelotti

Brazil coach Carlo Ancelotti chuan Vinicius Junior chu fit taka awm reng turin a duh a, FIFA World Cup 2026 squad-a tel tur chuan 100% a fit leh dam nih a pawimawh tur thu a sawi.

October khan Ancelotti chuan Neymar chungchang a lo sawi tawh bawk a, world champion vawi nga ni tawh Brazil tana inlan tur chuan rilru leh taksa inpeih famkim an nih a pawimawh thu a lo sawi tawh bawk.

Italian manager Ancelotti chuan, "Brazil tana inlan thei player tam tak an awm, chuvangin ram tana inkhel turte chu 100% fit an nih a ngai. Neymar ka sawina bik chauh a ni lem lo. Vinicius hi 90% chauhin fit ta se la, midang a fit famkim chu ka ko zawk ang.

"Player ṭha kan ngah, a bik takin hmatawng kan nei ṭha em em bawk, chuvangin Brazil tana khel phak nih hi a awlsam dawn lo a, inelna lian World Cup khel tur phei chuan kan inthlang fimkhur leh zual dawn a ni," tiin a sawi.

Brazil hian kuminah match khelh tur an nei tawh lo. World Cup 2026 khelh hma an inbuatsaih nan nakkum March hian France an tum dawn, friendly match an khelh hnuhnung hi a pawimawh zual tawh hle ang.