Dortmund pet chhuaktu Leverkusen

Bayer Leverkusen chuan Borussia Dortmund chu German Cup lat 16 aṭangin an pet chhuak, an mikhualna ramah Ibrahim Maza-a goal hmangin Leverkusen hian 1-0 in hnehna an chang a ni.

Signal Iduna Park-ah chuan Dortmund hi hneh harsa tak an ni, kumin March thla tir aṭang khan an mikhual lakah an la tlawm leh miah lo. Kar tawp Bundesliga inkhelah pawh khan Leverkusen hi khualmualah 2-1 in an hneh.

Mahse, German Cup-ah erawh thawnthu a danglam, kum 20 mi Maza hian minute 34-naah goal awmchhun a khung a, second half-a Martin Terrier-a goal khung erawh VAR hman a nih hnuah an hnawlsak thung.

Leverkusen hian RB Leipzig hnung zuiin quarterfinal hi an lut. Inkhel dangah Leipzig hian a tir lamah goal chhuah mah se FC Magdeburg chu 3-1 in an hneh, midfielder Christoph Baumgartner chuan goal hnih a khung a ni.

St Pauli pawhin Borussia Moenchengladbach chu 2-1 in an hneh a, inkhel dangah Hertha Berlin tan kum 16 mi Kennet Eichhorn chuan 2. Bundesliga team Hertha BSC chu 1. FCK lakah 6-1 in hnehna a chanpui.

Indopui pahnihna hnu lamah, kum 16 mi Eichhorn hi German Cup-a goal khung thei naupang ber a ni ta chiah bawk.