Quarterfinal-ah Juventus an lut

Juventus chuan Udinese chu 2-0 a hnehin Italian Cup quarterfinal an lut a, nizan khan last 16 match dang zawng khelh chhunzawm niin result erawh kan hre hman lo thung a ni.

Allianz Stadium, Turin-a inkhelah Juventus tan tha thawhhlawk tak mai chu Udinese defender Matteo Palma a ni daih! Minute 23-naah Weston McKennie chuan hlauhawm takin ball a lalut a, defender Palma hian Jonathan David-a ball chan tur ven a tumna lamah anmahni lamah a ti lut.

Kum 17 mi Palma a vanduai chhunzawm, second half-ah Juan Cabal a tih tluk avangin penalty a chawi, a tirah penalty pek tlang nghal ni lo mah se VAR hman a nih hnuah an pe a, substitute Manuel Locatelli chuan an goal hnihna atan a khung.

Juventus head coach Luciano Spalletti chuan, "A tir aṭanga a tawp thleng khan kan khel ṭha, tihsual lian tak kan nei lo tluan thei kha a lawmawm. Na takin goal kan nawr thei a, keimahni lam kan inveng ṭha em em bawk.

"Team ṭha tak ni turin kan indin chho leh mek a, kan khingpui chu tu te pawh ni se la theihtawp kan chhuah zel tur a ni ang. Team lian leh team te thliar thei kan ni lo," tiin a sawi a, nomawi eng emaw ber chu chawi ngei a tum ruh hle.

Juventus hian quarterfinal-ah chuan Atalanta leh Genoa te inkhela chak zawk an hmachhawn leh ang. Old Lady hian tun hmain Italian Cup hi vawi 15 lai mai an lo la tawh a, anni aia champion tam an awm lo - an record ṭha tak hi tih ṭhat zual an tum dawn a ni.