Everton chakna Grealish

Hun tawp dawn lama Jack Grealish-a goal khung hmangin Everton chuan AFC Bournemouth chu 1-0 in an hneh a, tun hnaia result ṭha lo Bournemouth an insiamṭha thei rih lo.

Vitality Stadium-a inkhelah team pahnih an inveng tawn a, goal khung theihna remchang ṭha an insiam thei mai lo. English forward Grealish hian yard 20-na hla aṭanga a pet chu Bafode Diakite chuan lo dang pialin keeper Djordje Petrovic tan dan theih a ni tawh lo a ni.

Toffees hi khualmualah a zawnin match hnih an chan tling ta, an tan chuan result duhawm a ni. Everton coach David Moyes chuan, "Old Trafford-ah hnehna kan chang a, tunah Bournemouth kan luhchhuah leh ta bawk.

"Hma lam panin kan kal zel ang, player ṭha leh theihna nei sang tak tak kan kawl avangin team lian dangte pawh kan el ngam tur a ni a, keimahni khelmualah pawh result ṭha kan neih chhunzawm theih ka beisei," tiin a sawi.

Everton hian Premier League match 14 an khelh aṭanga point 21 hmuin pakuana an ni mek a, pangana Brighton an phak lohna chu point khat chauh a ni. Champions League khel phak china awm Aston Villa nen an inthlauhna pawh point thum chauh a nih avangin beisei an nei sang ngam hi a mak hran lo.

Bournemouth erawh tun hnaiah an talbuai - an match hnuhnung panga zinga pali ngawtah an tlawm. Andoni Iraola leh a naute hian Inrinni zanah Chelsea an mikhual zui leh dawn, insiamṭhat a la harsa deuhin a rinawm.

Cherries coach Iraola chuan, "West Ham leh Sunderland lakah khan ṭha taka khel chungin kan chak zo lo, tun ṭumah kha chuan hnehna chan phu zawk ang pawhin kan khel chhuak lo, kan hmabak hi a hautak dawn hle," a ti.

Chelsea chauh a ni dawn a, Blues nen an inkhelh zawh hnuah Manchester United an lenchilh zui leh nghal dawn. Kumin chhungin Burnley, Brentford leh Chelsea bawk an la hmachhawn leh dawn a ni.