Bucks chak mah se Antetokounmpo inhliam

Nimin zing NBA regular season inkhelah Milwaukee Bucks chuan Detroit Pistons chu 113-109 in an hneh. Bucks hi chak mah se an thiampuipa Giannis Antetokounmpo a inhliam avangin an lawm erawh a kim lo.

Inkhel ṭan aṭanga minute thumna lekah Antetokounmpo hi a hliam, court chhuahsan tur pawhin a ṭhianten an puih a ngai hial - hliam vang hian engtiang chena rei nge a chawlh a ngaih dawn tih erawh a lo chiang lo thung.

Bucks hian inkhel bul an ṭan fuh lo, quarter hmasa berah phei chuan point 18 laia hniam zawk lai pawh an nei. Mahse, zawimuangin an pawtthla zel a, an match hnuhnung 10 aṭanga an chak vawi hnihna an tawng a ni.

Bucks head coach Doc Rivers chuan, "Thil thleng a tam hle, a tirah kan hnufual nasa hle, a hnuah tho kang deuhin kan khingpui lam an inhawng zau ve thung. Giannis a hliam a, boruak danglam tak tak kan tawng a ni," tiin a sawi.

NBA Most Valuable Player vawi hnih ni tawh Giannis hi a chawn dinglam a hliam a, Greek power forward hliam hi MRI hmanga endik a nih hnuah a dinhmun tur a chiang chauh ang.

Nimin zing inkhel dangah James Harden leh Kawhi Leonard te chuan point 48 thawk chhuakin Los Angeles Clippers chu Atalanta Hawks lakah 115-92 in an chakpui a, a zawna match nga an tlawm tawhna record duhawm lo chu an thai bo.

Denver Nuggets tan Jamal Murray chuan point 52 ngawt a nei a, tun season kal laiah match khata point a neih tam ber ṭum a tawng, a team hi Indianapolis lakah 135-120 in hnehna a chanpui ve thung a ni.