Palace chak ve leh ta

A zawna match hnih an tlawm hnuah Crystal Palace chuan chak ni hmel an hmu ve leh ta. Nilaini zan Premier League inkhelah Palace hian Burnley chu 1-0 in an hneh a, goal awmchhun hi chawkhlawk hma hreta Daniel Munoz khung a ni.

Turf Moor-a inkhelah, team pahnih an inveng tawn hle. Marc Guehi-a ball pek chu Munoz hian tlu chungin a tauh lut a, an mahni goal an venhim zui avangin khualmual aṭanga point thum hlawh chhuah nan a tawk.

Mualneitu Burnley lamin a tirah inkhel an thunun a, mahse remchang ṭha an nei thei lo. Jaidon Anthony-a'n hlauhawm takin pet mah se Palace goalkeeper Dean Henderson chuan a lo dansak, a hnuah hun ṭha an hmun zui ta bik lo a ni.

Palace manager Oliver Glasner chuan, "Inkhel kha hlawm hnihin a ṭhen theih, minute 60 chhung kan khel ṭhain kan chungnung zawk, minute 30 dang erawh a talbuai zawk kan ni, chutiang chunga kan chak thei hi a lawmawm," a ti.

Season hmang ṭha tak Crystal Palace hian point 23 hmuin pangana dinhmun an luah a, an chunga awm Chelsea an phak lohna chu point khat chiah a ni - season thara Europen football khelh an tumna a la nung ṭha hle.