Forest an chak ve leh ta

Sean Dyche-a hnuaia harhtharna chan beisei Nottingham Forest-in hnehna an chang ve leh ta a, Nilaini zan khan Premier League table mawngphah luahtu Wolverhampton Wanderers chu 1-0 in an hneh.

Forest tan Igor Jesus chuan inkhela goal awmchhun a khung a, Wolves-in a chhanletna tur an neih loh avangin an tlawm - Wolves hi league match sarih zet chu a zawnin an tlawm ta a, team 20 inelnaah 20-na an ni mek!

Wolves hian relegation zone aṭanga a him china awm Leeds United chu point 12-in an phak lo mek a, tun season-a match 14 an khelh tawhah chak an la nei miah lo - match hnih draw nei tawhin, point hnih chiah an nei.

Season hmasaa 16-na ni chunga season khar club hian November 2 khan coach Vitor Pereira chu banin, November 12 khan Rob Edwards an la lut a, mahse, Middlesbrough aṭanga an lakluh coach ho hian league match thum khel tawhin an tlawm vek a, goal khung an nei lo!

Hetihrual hian Forest thawnthu erawh a danglam thung. Liverpool khelmuala 3-0 a chak thei team hian tun season-ah coach pathum an nei tawh a, tuna an coach Sean Dyche hi an coach pathumna a ni.

Everton boss hlui ho hian league match ruk khel tawhin, vawi thum an chak a, vawi hnih tlawmin, vawi khat draw an nei - table-ah 15-na niin, relegation zone an hlat tial tial.