Clippers aṭangin Paul a chhuak

Los Angeles Clippers chuan NBA player ropui zinga mi Chris Paul chu an team aṭanga a chhuah thu an sawi a, NBA All-Star zinga vawi 12 tehmeuh tel tawh nen hian an inṭhen ta a ni.

Clippers hi tun hnaiah an che fuh lo, an match hnuhung 16 zinga 14 laiah an tlawm. Nimin zing khan Atlanta Hawks chu 115-92 in an hneh a, he inkhelah hian Paul hi a inlan ve tawh lo.

Clippers chief Lawrence Frank chuan, "Paul chuan kan team a chhuahsan fel tawh a, kan zingah a awm ve tawh lo. Clippers tan chuan player ropui leh hriatreng hlawh tur a ni a, tun laia kan khelh ṭhat tawk loh chhanah pawh tumahin amah hi an mawhphuh lo a ni.

"Chris hian kan team tan hna tam tak a thawk a, thil ropui leh ṭha tam tak min tawnpui. Kan tana a hna thawh zawng zawng hi kan theihnghilh tawh lo ang," tiin an player ropui chu a thlah.

Paul pawhin social medai kaltlangin Clippers nen an inṭhen thu hi a ziak chiang tawh a, a chhan tak erawh sawi lan a ni lo thung. Paul hian Clippers tan kum 2011 aṭanga 2017 chhung khan a lo khel tawh, July khan kum khat atan inremna an ziak leh a ni.

Basketball inelna lian NBA-ah hian assist nei tam pahnihna a ni a, a ṭhiante basket neih tur vawi 12552 teh meuh a siamsak tawh a, a chungah hiawn John Stockton (15,806) chauh a awm.

Steal neih tam lamah pawh pahnihna dinhmun a luah, vawi 2,728 nei tawhin a tluk loh chu Stockton-a bawk (3,265) a ni a, kum 40 a nih tawh avangin a vanglai a pel tawh.

NBA title vawi riat ngawt la tawh a nih avangin engti zawng mah a sawi nep theih a ni lo ang.