Goal li khungtu Villa an chak

Aston Villa-in an harhtharna chan an chhunzawm zel - Unai Emery naute hian Brighton & Hove Albion khelmualah goal thum ngawt chhuah mah se, goal li an khung avangin, 4-3 in an chak a, Liverpool laka an tlawm hnuah league match li a zawnin an chak leh ta.

Brighton hian minute kuana lekah Jan Paul van Hecke hmangin goal hmahruai an khung a, minute 29-naah Jack Hinshelwood-a ball pet chuan Villa defender Pau Torres per zuiin, minute 30 pawh a tlin hmain Brighton hian 2-0 in hma an hruai der!

Mahse, Villa-in tlawm an lo tum reng reng lo. Tun season-a goal khat chiah la khung Ollie Watkins chuan a thiam a la theihnghilh lo tih pholangin, minute 37-na leh first half hun pek belhah si phurh a sut zo der!

Villa an phur laklawh tawh a, inkhel ṭantir lama tlawm mai tur anga lang tawh hman team khan goal hnih an khung belh - Amadou Onana leh bench aṭanga luhtir Donyell Malen ten goal khat ve ve an khung a, 4-2 a ni ta daih.

Brighton tan minute 83-naah Van Hecke chuan a goal hnihna khung ve leh mah se, a tlai hret tawh a, goal dang lut tawh loin, mikhual team zawk Villa hi 4-3 in an chak - table-ah pathumna an ni a, point ruk chauhin hmahruaitu Arsenal an thlau mek.

Villa hian season bul an ṭan ṭha lo hle - an league match hmasa pangaah chak an nei miah lo! Match hnih an tlawm a, vawi thum an khingpui an inhnehtawkpui. Mahse, an match ruknaah 3-1 in Fulham an hneh a, Liverpool lakah an tawlhthlu zeuh tih loh chu an hawikir tawh lo.

Unai Emery naute hi an league match hnuhnung pakuaah vawi riat an chak a, vawi khat an tlawm - an hneh zingah Tottenham Hotspur leh Manchester City an tel avangin, eng team pawh hneh turin an ṭha tawk tih a lang.